කඳානේ පදිංචිව සිටි අවුරුදු 84ක කාන්තාවක් කොවිඩ් ආසාදනය වීම හේතුවෙන් ජීවිතක්ෂයට පත්ව තිබේ.

බොරලන්ද පොලිස් අභ්‍යාස විද්‍යාලයේ නිරෝධායනය වෙමින් සිටින පොලිස් නිලධාරීන් විසි එක් දෙනකුට කොරෝනා ආසාදනය වී ඇති බවට අද (9දා) ලැබුණු පී. සී. ආර්. පරීක්ෂණවලින් තහවුරු වන බව සෞඛ්‍ය අංශ අනාවරණය කරයි.

“වසංගත ව්‍යාප්තිය හමුවේ අපට ගත හැකි විකල්ප 03ක් තියෙනවා. එක ඇඳිරි නීතිය පනවා රටම ලොක් ඩවුන් කිරීම, දෙවැන්න කිසිවක් නොකර සිටීම, තුන්වැන්න රෝගය පාලනය කරන අතර, රට සාමන්‍ය පරිදි පවත්වාගෙන යාම. අප තෝරාගත්තේ තුන්වැනි විකල්පය”

දැනට පවතින වැසි තත්ත්වය උතුර, උතුරුමැද පළාත් හා ත්‍රිකුණාමලය දිස්ත්‍රික්කය සඳහා වැඩි අවධානම් ලෙස තවදුරටත් පවතින බව කාලගුණ විද්‍යා දෙපාර්තමේන්තුව නිවේදනයක නිකුත් කරමින් සඳහන් කරයි.

අද (09) තවත් කොවිඩ් ආසාදිතයින් 184 දෙනෙක් හඳුනාගත් බව යුද හමුදාපති ලුතිනන් ජෙනරාල් ශවේන්ද්‍ර සිල්වා මහතා පවසයි.

කොවිඩ් 19 ආසාදනය වීමෙන් ඉතාලියේ මිලාන් නගරයේ රැකියාව කරමින් ජිවත් වු ශ්‍රී ලාංකිකයෙක් ඊයේ(08) මියගොස් තිබේ.

කොවිඩ් 19 වසංගත තත්ත්වය හේතුවෙන් නැවත දැනුම් දෙන තුරු පාර්ලිමේන්තු රැස්වීම් පාර්ලිමෙන්තු මාධ්‍ය වේදීන්ගේ සහාගිත්වයෙන් තොරව පවත්වාගෙන යෑමට පාර්ලිමේන්තු කටයුතු පිළිබඳ කාරක සභාව තීරණය කර තිබේ.

විදේශ තානාපති සේවය සදහා ශ්‍රී ලංකා රජය විසින් නම් කළ නව තානාපතිවරුන් 7 දෙනෙකුට පාර්ලිමේන්තුවේ උසස් නිලතල පිළිබද කාරක සභාවේ අනුමැතිය අද (09) හිමිවිය.

වහාම ක්‍රියාත්මක වන පරිදි කඳාන සහ මහබාගේ යන පොලිස් බලප්‍රදේශ නැවත දැනුම් දෙන තුරු හුදෙකලා කෙරේ.

මෙරට සෞඛ්‍ය සේවයට ඉතා පහසුවෙන් කොවිඩ් මර්දනය කළ හැකි බවත්, අවශ්‍ය වන්නේ ජනතා සහය බවත්, ජනාධිපති ගෝඨාභය රාජපක්ෂ පවසයි. කොවිඩ් වසංගතය “සෞඛ්‍ය” ගැටළුවකි. ඉන් ජනතාව රැකගෙන රට ඉදිරියට ගෙන යාම සෞඛ්‍ය සේවාව සහ රජය සතු වගකීමයි. ලොව ඉහළම දැනුමකින් සමන්විත මෙරට වෛද්‍යවරුන්ට සහ සෞඛ්‍ය ක්ෂේත්‍රයට එය කළහැකි බව තමා දැඩි ලෙස විශ්වාස කරන්නේ යයි ජනාධිපතිතුමා කියා සිටී.

2020 විසර්ජන කෙටුම්පත ඉදිරිපත් කරනු ලබන නොවැම්බර් 12 වැනිදා පෙරවරු 10.00 සිට රාත්‍රී 8.00 දක්වා පාර්ලිමේන්තු රැස්වීම පැවැත්වීමට පාර්ලිමේන්තු කටයුතු පිළිබඳ කාරක සභාව අද (09) තීරණය කළේය.

අඟුලාන පොලිස් බලප්‍රදේශයට අයත් ග්‍රාම නිලධාරී කොට්ඨාස දෙකක් වහාම ක්‍රියාත්මක වන පරිදි හුදකලා කර තිබේ.

අද (09) දිනයේ නව කොවිඩ් ආසාදිතයින් 172ක් හමුවී තිබේ.

හුදකලා කර තිබූ තවත් ග්‍රාම නිලධාරි කොට්ඨාස කිහිපයක් යළි විවෘත කළ බව යුද හමුදාපති ලුතිතන් ජෙනරාල් ශවේන්ද්‍ර සිල්වා මහතා සඳහන් කරයි.

කඩුවෙල මහනගර සභාවේ සේවයේ නියුතු රියදුරකට කොරෝනා වෛරසය ආසාදනය වී ඇති බවට අද වාර්තා වූ බව කඩුවෙල නගරාධිපති බුද්ධික ජයවිලාල් මහතා පැවසීය

ගාල්ල කරාපිටිය රෝහලේ නේවාසිකව ප්‍රතිකාර ලබමින් සිටි අකුරැස්සේ අමලගොඩ පදිංචි කාන්තාවක් කොරෝනා ආසාදිත බව තහවුරුවීම හේතුවෙන් රෝහලේ මනෝ වෛද්‍ය ප්‍රතිකාර ඒකකය (23 වාට්ටුව) අද (09) සිට තාවකාලිකව හුදකලා කිරීමට කටයුතු කර තිබේ.

මතුගම සෞඛ්‍ය වෛද්‍ය නිලධාරී කාර්යාලයේ සේවය කරන සේවකයෙකුටත් කොරෝනා වෛරසය ආසාදනය වී ඇති බවත් එම නිසා එම කාර්යාලයේ සේවය කල වෛද්‍යවරුන් ඇතුළු සියලු දෙනාගේ පී.සී.ආර්.පරීක්ෂණ සිදුකල බවත් පී.සී.ආර්.පරීක්ෂණ සිදුකල සියලු දෙනා ස්වයං නිරෝධායනයට යොමුකල බවත් මතුගම පරිපාලන මහජන සෞඛ්‍ය පරීක්‍ෂක ජී.ඩී.ලයනල් මහතා පැවසීය.

තවත් කෝවිඩ් ආසාදිතයින් 595 දෙනෙක් පූර්ණ සුවය ලබා පිටව ගොස් ඇත.

කළුතර දිස්ත්‍රික්කයේ සෞඛ්‍යය වෛද්‍ය නිලධාරී බල ප්‍රදේශ 15 තුළ කොරෝනා වෛරසය ආසාදිත රෝගීන් 663 දෙනෙකු (9) දින ට වාර්තා වී ඇතැයි කළුතර ප්‍රාදේශීය සෞඛ්‍ය සේවා අධ්‍යක්ෂක වෛද්‍ය උදය රත්නායක මහතා පැවසීය.

බස්නාහිර පළාතේ පොලිස් ස්ථානවලට අනුයුක්ත නිලධාරීන් 256 දෙනෙකු කොවිඩ් ආසාදිතයින් ලෙස හඳුනාගෙන තිබේ.

රත්නපුර දිස්ත‍්‍රික්කය තුල කෝවිඩ් 19 ආසාදිතයන් ගණන ඊයේ දහවල් වනවිට (100) වු බව රත්නපුර දිස්ත‍්‍රික් ලේකම් මාලනී ලොකුපෝතාගම මහත්මිය පැවසුවාය.

පි.සි.ආර් පරීක්ෂණවලින් වාර්තා 74ක් අද 09දා දහවල් ලැබුණු අතර ඉන් 06දෙනෙකුට කොවීඩ් ආසාදනය වී ඇති බව අගලවත්ත සෞඛ්‍ය වෛද්‍ය නිලධාරී වෛද්‍ය දමින්ද සේනානායක මහතා කියා සිටියේය.

මාසයක පමණ කාලයක් ගම්පහ දිස්ත්‍රික්කයට පනවා තිබූ නිරෝධායන ඇදිරි නීතිය අද (9) අලුයම ඉවත් කළ පසුව ජනතාව සාමාන්‍ය වශයෙන් ගම්පහ නගරයට පැමිණියද බස් ධාවනය නිසි පරිදි නොවු ආකාරයක් දක්නට ලැබිණි.

කඨින පිංකම් පැවැත්වීමේදී පූජා භූමිය තුළ රැඳිය හැක්කේ බැතිමතුන් 25ක් බව සෞඛ්‍ය සේවා අධ්‍යක්ෂ ජනරාල්වරයා පවසයි. මෙහිදී මුව ආවරණ පැළදීම, සමාජ දුරස්ථභාවය ආරක්ෂා කර ගැනීම වැනි කටයුතු අනිවාර්යයෙන්ම පිළි පැඳිය යුතු බවත් සෞඛ්‍ය සේවා අධ්‍යක්ෂ ජනරාල්වරයා නිකුත් කළ නිවේදනයේ සඳහන් වෙයි.

දඹුල්ල ආර්ථික මධ්‍යස්ථානයට 09 දින එළවළු විශාල ප්‍රමාණයක් ලැබී ඇතත් ඒවා මිලදී ගැනීමට ප්‍රමාණවත් වෙළෙන්දන් නොපැමිණීම නිසා අලෙවි කර ගැනීමට නොහැකිව මිලද විශාල වශයෙන් පහත වැටි ඇති බව ගොවීහු කියති.

මහනුවර පොලිස් කොට්ඨාසය පූජාපිටිය පොලීසියේ ප්‍රජා පොලිස් ඒකකයේ සේවය කළ උප පොලිස් පරීක්ෂකවරයෙකුට කොවිඩ් 19 වෛරසය ආසාදනය වී ඇති බවට පි.සි.ආර්. පරීක්ෂණවලින් තහවුරු වී තිබේ .

ඉකුත් 07දින හලාවත රෝහලේදී මරණයට පත් සිය නිවසේදී නිරෝධායනය වෙමින් සිටි පුද්ගලයෙකු සම්බන්ධයෙන් සිදුකළ පී.සී.ආර්. පරීක්ෂණයේදී ඔහුට කොවිඩ් 19 වෛරසය අසාදනය වී නැතිබව හලාවත රෝහල් බළධාරීන් පවසයි.

කොරෝනා වසංගතය හේතුවෙන් බස්නාහිර පළාතට ඇඳිරි නීතිය පැනවීමත් සමඟ තාවකාලිකව නවතා දැමූ දුම්රිය ගමන් අද යළිත් ආරම්භ කළ අතර බෙලිඅත්තේ සිට කොළඹ බලා සීමිත මගීන් පිරිසක් රැගෙන සාගරිකා දුම්රිය පිටත් විය.

දීපාවලී උත්සව සමයේදී උඩරට වතුකරය තුල කොවිඩ් වෛරසය පැතිරීයාමේ දැඩි අවධානමක් මතුවිය හැකි බවට සෞඛ්‍ය අංශ නිලධාරීහු පෙන්වා දෙති.