ලියාපදිංචි වීමට නොහැකි වූවන්ට අගෝස්තු මාසයේ දී යළිත් අවස්ථාව. ලිඛිත අභියාචනා සහ විරෝධතා ඉදිරිපත් කිරීමට ජූලි 10වනදා තෙක් අවස්ථාව.

පූනාගල සිට කොස්ලන්ද දක්වා පාසල් ළමුන් ප්‍රවාහනය කරමින් තිබූ ත්‍රීවිල් රථයක් අද 30 කොස්ලන්ද දෙමළ මහා විදුහල ආසන්නයේදී බස් රථයක පිටුපස හැපි නැවත අඩි තිහක පමණ ප්‍රපාතයකට පෙරළීමෙන් එහි ගමන් ගත් පාසල් දරුවන් පස් දෙනෙකු සහ තීරෝද රථ රියදුරු තුවාල ලබා කොස්ලන්ද දිසා රෝහලට ඇතුළත් කළ බව කොස්ලන්ද පොලීසිය කියයි.

කින්නියා පොලිස් වසමේ සුරංගල්, තඹලගමුව මාර්ගයේ රතු පාලම ආසන්නයේ යතුරු පැදියක් වේගය පාලනය කර ගැනීමට නොහැකිව මාර්ගයේ අයිනේ තිබූ බෝක්කුවක ගැටීමෙන් සිදුවූ අනතුරකින් අවුරුදු 5ක් වන දැරියක් මියගොස් ඇති බව පොලීසිය පවසයි.

ප්‍රියංකරගම, අධිරාණිගම ප්‍ර දේශයේ නිවසක තනිව ජීවත් වූ යුද හමුදා සෙබෙලෙක් අභිරහස් ලෙස මියගොස් ඇතැයි පොලිසිය කියයි. අවුරුදු 31ක් වන පනාගොඩ යුද හමුදා කඳවුරේ සේවය කළ සෙබෙලෙක් මෙසේ ජීවිතක්ෂයට පත්ව තිබේ.

ඉඟිනියාගල, වාවින්න ප්‍ර දේශයේදී කොස් ගෙඩියක් කැඩීම සඳහා කොස් ගසකට නැගි පුද්ගලයෙක් කොස් ගසින් වැටී ජීවිතක්ෂයට පත්ව ඇති බව පොලීසිය කියයි.

නුවරඑළිය ග්‍රෙගරි වැව ආසන්නයේ හෝටලයක සැඟවී සිටි අපරාධ රැසකට සම්බන්ධ ප්‍රධාන පෙළේ පාතාල සාමාජිකයෙකු සමඟ යුදහමුදාකපිතාන්වරයෙක් ගිනි අවි හා ජීව උණ්ඩ තොගයක් සමග අත්අඩංගුවට ගත් බව අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන හා සංවිධානාත්මක අපරාධ කොට්ඨාසය කියයි.

දිවයිනේ නිරිත දිග කොටසට බලපා ඇති වැසිබර තත්ත්වය තවදුරටත් අපේක්ෂා කරන බව තද වැසි පිළිබඳව අවවාදාත්මක නිවේදනයක් නිකුත් කරමින් කාලගුණ විද්‍යා දෙපාර්තමේන්තුව සඳහන් කරයි.

82 හැවිරිදි විශ්‍රාමික ජ්‍යෙෂ්ඨ පොලිස් අධිකාරීවරයෙකු විසින් යාබද ඉඩමේ තිබූ ඇහුලු බව පවසමින් පිස්තෝල ගිනි අවියක් සහ ජිව උණ්ඩ විසි හතරක් අඩංගු මැගසිනයක් මොරටුව පොලිසිය වෙත භාරදී ඇතැයි ගල්කිස්ස කොට්ඨාසයේ උසස් පොලිස් නිලධාරියකු පැවැසීය’

ශ්‍රී ලංකා විදේශ සේවා නියුක්ති කාර්යාංශයේ ලියාපදිංචි ගාස්තු සහ නියෝජිතායතන අලුත් කිරීමේ ගාස්තු සංශෝධනය කිරීමට කටයුතු කර තිබේ. මේ සඳහා කම්කරු අමාත්‍යාංශයේ ලේකම්වරයා අති විශේෂ ගැසට් නිවේදනයක් නිකුත් කර ඇති අතර එම ගාස්තු සංශෝධනය ජුලි මස පළමුවැනිදා සිට ක්‍රියාත්මක වෙයි.

ශ්‍රී ජයවර්ධනපුර රෝහල් මණ්ඩලයේ නව සභාපතිවරයා ලෙස වෛද්‍ය නිහාල් ජයතිලක මහතා පත්කරනු ලැබ තිබේ.

මෙරටට ලැප්ටොප් පරිගණක ගෙන්වා බෙදාහැරීමේ කොල්ලුපිටිය මල් පාර ප්‍රධාන සමාගමකට රාත්‍රී කාලයේදී හොර රහසේ ඇතුළු වී රුපියල් ලක්ෂ නවයකට ආසන්න ලැප්ටොප් පරිගණක සොරාගත් වැඩ තහනමට ලක් වූ පොලිස් සැරයන්වරයෙක් අත්අඩංගුවට ගත් බව කොල්ලුපිටිය පොලිසිය කියයි.

ශ්‍රී ලංකාවට මේ වසරේ මේ දක්වා පැමිණ ඇති සංචාරකයන් සංඛ්‍යාව ලක්ෂ 6 සීමාව ඉක්මවා ගියේය. ඒ මේ මාසයේදී මේ දක්වා ශ්‍රී ලංකාවට සංචාරකයන් 84000ක් පැමිණීමත් සමගිනි.

නව ගුවන් හමුදාපතිවරයා ලෙස එයාර් මාෂල් උදේනි රාජපක්ෂ මහතා ජුනි 30 වනදා පත්කිරීමට නියමිතව තිබේ මෙරට 19වැනි ගුවන් හමුදාපතිවරයා ලෙස ඔහු එම ධුරයේ වැඩභාර ගැනීමට නියමිතය.

ගුවන් හමුදාපති එයාර් මාර්ෂල් සුදර්ශන පතිරණ මහතා තරු හතර එයාර් චීෆ් මාර්ෂල් නිලයට උසස් කිරීමට ජනපති රනිල් වික්‍රමසිංහ මහතා කටයුතු කර තිබේ. ඔහුගේ උසස්වීම අද (29දා) සිට ක්‍රියාත්මක වෙයි.

හිටපු පාර්ලිමේන්තු මන්ත්‍රිනී විජයකලා මහේෂ්වරී මහත්මිය ගමන් ගත් වෑන් රථයක් අනතුරට ලක් වීමෙන් මන්ත්‍රීවරිය ඇතුළු තිදෙනෙකු රෝහල් ගත කර ඇතැයි මුන්දලම පොලීසිය සඳහන් කරයි.

2022 මාර්තු 31 වනදා සිට 2023 ජූනි 30 වනදා දක්වා කාලය තුළ නිකුත් කර ඇති තාවකාලික රියදුරු බලපත්‍ර වල වලංගු කාලය වසර දෙකකින් දීර්ඝ කරමින් ප්‍රවාහන අමාත්‍ය බන්දුල ගුණවර්ධන මහතා අතිවිශේෂ ගැසට් නිවේදනයක් නිකුත් කර තිබේ.

මේ වසර අගදී පැවැත්වෙන ලෝක කුසලාන ක්‍රිකට් තරගාවලියේ අවසන් මහා තරගයට සත්කාරක ඉන්දියාව සහ එංගලන්තය පැමිණෙනු ඇතැයි ශ්‍රී ලංකා හිටපු දඟ පන්දු යවන ක්‍රීඩක මුත්තයියා මුරලිදරන් අනාවැකි පළ කළේය.

මෙරට රිළවුන් චීනයේ සත්වෝද්‍යාන සඳහා ලබා දීමේ වැඩ පිළිවෙළ පිළිබඳව නීතිමය වශයෙන් ඇතැම් පරිසර සංවිධාන විසින් ගෙන ඇති ක්‍රියාමාර්ග නිසා දැනට එම වැඩ පිළිවෙළ නැවතී ඇත. නමුත් චීනයේ පුද්ගලික සමාගමක් තවමත් එම සතුන් ලබා ගැනීම සදහා ඉදිරිපත් ව සිටින බව කෘෂිකර්ම අමාත්‍ය මහින්ද අමරවීර මහතා සඳහන් කළේය.

ශ්‍රී ලංකා මැතිවරණ කොමිෂන් සභාව වෙත හා මානව හිමිකම් කොමිෂන් සභාව වෙත සාමාජිකයන් පත්කිරීමට ජනපති රනිල් වික්‍රමසිංහ මහතා කටයුතු කළ බව ජනපති මාධ්‍ය අංශය පවසයි.

දේශීය ණය ප්‍රතිව්‍යුහගත කිරීමේදී සේවක අර්ථ සාධක අරමුදල වෙත බලපෑමක් ඇති නොවන බවත් ඒ සඳහා ලබාදෙන සියයට 9ක පොලිය සහතික කරන බවත් මහ බැංකු අධිපති ආචාර්ය නන්දලාල් විරසිංහ මහතා පැවැසීය.

බදු අය කර ගැනීමේදී මතුවන නෛතික ගැටලු කඩිනමින් විසඳීම සඳහා විශේෂිත අධිකරණයක් ස්ථාපිත කිරීම ඇතුළු විශේෂ යෝජනා මාලාවක් නුදුරේදීම ජනාධිපතිවරයාගේ අනුමැතිය සඳහා ඉදිරිපත් කරන බව මුදල් රාජ්‍ය අමාත්‍ය රංජිත් සියඹලාපිටිය මහතා පැවසීය.

ණය ප්‍රතිව්‍යුහගත කිරීමට අදාළ යෝජනාවලිය පිළිබඳ සාකච්ඡා කිරීමට පාර්ලිමේන්තුවේ මුදල් පිළිබඳ කාරක සභාව අද (29දා) එහි සභාපති පාර්ලිමේන්තු මන්ත්‍රී හර්ෂද සිල්වා මහතාගේ ප්‍රධානත්වයෙන් රැස්වීමට නියමිතව තිබේ.

ශ්‍රී ලංකාවට අමෙරිකානු ඩොලර් මිලියන 700ක මුදලක් ලබාදීමට ලෝක බැංකුව අනුමැතිය ලබා දී තිබේ. මෙම මුදලින් ඇමෙරිකානු ඩොලර් මිලියන 500ක් අයවැය සහාය වශයෙන් හා ඇමෙරිකානු ඩොලර් මිලියන 200ක් සමාජ ආරක්ෂණ කටයුතු වෙනුවෙන් වෙන් කර තිබේ.

ජපානයේ නරීටා ජාත්‍යන්තර ගුවන් තොටුපොළ බලා කටුනායක ගුවන් තොටුපොළෙන් පිටත් වූ ශ්‍රී ලන්කන් ගුවන් යානය , කාර්මික දෝශයකට ලක් වීම නිසා පැය 02 යි විනාඩි 25 ක කාළයක් ගුවන් ගැනීමෙන් අනතුරුව යළිත් කටුනායක ගුවන් තොටුපොළ වෙත ගොඩ බැස්සවීමට සිදු වූ බව 06/29 දින අලුයම ගුවන් තොටුපොළ කාර්යය භාර නිලධාරීවරයා පැවසීය.

2019 වසරේ පවත්වන ලද සීමිත තරඟ විභාගය පදනම් කරගෙන විදුහල්පති තුන්වන ශ්‍රේණිය සඳහා නව පත් කිරීම් වළක්වාලමින් ශ්‍රේෂ්ඨාධිකරණය අතුරු තහනම් නියෝගයක් අද (28) නිකුත් කළේය.

ගෞතම බුදුන් වහන්වසේ පෙන්වා දුන් උතුම් වූ බුද්ධ දර්ශනය ලොවටම ගෙන යාමේ වැඩ පිළිවෙල ක්‍රමවත්ව සහ විධිමත් වූ ක්‍රමවේදයක් අනුව සිදු කිරීම සඳහා බෞද්ධ සබඳතා පිළිබඳ කාර්යාංශයක් බුද්ධශාසන, ආගමික හා සංස්කෘතික කටයුතු අමාත්‍යාංශ පරිශ්‍රයේදී ස්ථාපිත කළ බව විෂයය භාර අමාත්‍ය විදුර වික්‍රමනායන මහතා සඳහන් කළේ ය.

මාස 06 සිට අවුරුදු 03 දක්වා දරුවන්ට ත්‍රිපෝෂ ලබාදීම නවතා දැමීම නිසා හා වයස අවුරුදු 03ත් අවුරදු 05ත් අතර අඩු බර දරුවන්ට ත්‍රිපෝෂ ලබාදීම නිසි අයුරින් සිදුනොවීම නිසා පෝෂණය සම්බන්ධ ගැටලු ඇති වෙමින් තිබෙන බව සමස්ත ලංකා පවුල් සෞඛ්‍ය සේවා නිලධාරිනියන්ගේ සංගමය පවසයි.

‘ගැහනු ළමයෙකු වෙල ඉපදිලා ඉපිදිලා ජීවත්විමට ලැබීමමට හරි දුකක්. මට අදින්න පළදින්න ජිවත් වන්න උවමනා කරන්නේ කොල්ලෙක් වගේ’ කියා මවට ලිපියක් ලියා තබා කදාන ප්‍රදේශයේ උතුරු බටගම පදිංචි 14 හැවිරිදි පාසැල් දැරියක් තම නිවසේ තමාගේ නිදන කාමරයේ ගෙල වැලලා ගෙන මියගොස් ඇති බව කදාන පොලිසිය පවසයි.

පවුල් ආරාවුලක් විසඳා ගැනීමට කුරුණෑගල මූලස්ථාන පොලීසියේ විවිධ පැමිණිලි අංශයට පැමිණි කාන්තාවක් පැමිණිල්ල විභාගයට ගනිමින් සිටි අවස්ථාවේදී තම විවාහක සැමියා සහ පොලිස් නිලධාරීන් ඉදිරිපිටදීම වස පානය කිරීමේ සිද්ධියක් ඊයේ (27දා) වාර්තා විය.