ව්‍යාපාරිකයන්ගේ ඉ-මේල් තොරතුරු ඔස්සේ මුදල් වංචා කිරීමේ තැතක්

මෙරට භාණ්ඩ ආනයනය සහ අපනයනය කරන ව්‍යාපාරිකයන්ගේ  ඉ-මේල් පණිවිඩවල අඩංගු තොරතුරු ආශ්‍රයෙන් මුදල් වංචා කිරීමේ කූඨ ජාවාරමක් පිළිබඳ තොරතුරු වාර්ථා වී ඇතැයි ශ්‍රී ලංකා පරිගණක හදිසි ප්‍රතිචාර සංසදය (SRI LANKA CERT) පවසයි.

ව්‍යාපාරික කටයුතුවලදී තමන්ගේ ව්‍යාපාරික සගයාගේ මුදල් ගෙවීම් සඳහා භාවිත කළයුතු සුපුරුදු බැංකු ගිණුම වෙනස් කර ඇති බවට දැනුම් දීමක් හෝ එය වෙනස් කර ඇති බවට ඉ-මේල් පණිවිඩයක් ලැබුණහොත් දුරකථන ඇමතුමක්දී තොරතුරු තහවුරු කර ගැනිමෙන් පසු ඊට ප්‍රතිචාර දැක්වීම වඩා වැදගත් බව සංසදය සඳහන් කරයි.  

මෙහිදි අදාළ ව්‍යාපාරිකයන් සිය ව්‍යාපාරික කටයුතු වෙනුවෙන් හුවමාරු කර ගන්නා ඉ-මේල් පණිවිඩ ‍වල තොරතුරු යොදා ගනිමින් මෙම වංචා සහගත ක්‍රියාව සිදුකරන බවත්, පසුගිය මාස දෙකක කාලය තුළදී මේ සම්බන්ධව පැමිණිලි 10ක් පමණ ලැබී තිබෙන බවත්, ශ්‍රී ලංකා පරිගණක හදිසි ප්‍රතිචාර සංසදයේ ප්‍රධාන තොරතුරු ආරක්ෂක ඉංජිනේරු රොෂාන් චන්ද්‍රගුප්ත මහතා පවසයි.

විශේෂයෙන්ම මෙහිදී මුදල් බැරකළ යුතු බැංකු සහ ගිණුම් අංක පිළිබඳ ව්‍යාජ තොරතුරු එම ව්‍යාපාරිකයන් වෙත යොමුකර ‍ඔවුන් නොමග යවමින් මෙම වංචාව  සිදු කරන බවත්, මේ වනවිට රු.මිලියන 15ක පමණ මුදලක් වංචා කර තිබෙන බවට තොරතුරු අනාවරණය වී තිබෙන බවත් චන්ද්‍රගුප්ත මහතා වැඩිදුරටත් සඳහන් කරයි.

මේ අන්දමින් සිදුකරන වංචනික ක්‍රියාවන්ට ගොදුරුවීමෙන් වැළැක්විම සඳහා නිරන්තරයෙන් දැනුවත් කිරීම් සහ තාක්ෂණික උපදෙස් ලබාදීම සිදුකරන බවත් 0112691692 දුරකථන අංකයට ඇමතීමෙන් මේ පිළිබඳ වැඩිදුර විස්තර දැනගත හැකි බවත් සංසදය පවසයි.