ETI ෆිනෑන්ස් අර්බුදය විසඳීමට ක්‍රියාමර්ග රැසක් - මහ බැංකුව

ශ්‍රී ලංකා මහ බැංකුව විසින් ඊ ටී අයි ෆිනෑන්ස් ලිමිටඩ් ආයතනය 2017 අගභාගයේ සිට මුහුණ දුන් උග්‍ර ද්‍රවශීලතා අර්බුදයද ඇතුලත්ව 2011 සිට පැවති විවිධ අක්‍රමිකතා සඳහා විසඳුම් ලබා දීමට ක්‍රියාමාර්ග රැසක් ගෙන තිබේ.

ඊ ටී අයි ෆිනෑන්ස් ලිමිටඩ් ආයතනයේ පැවති අතිශයින් අවදානම් ද්‍රවශීලතා තත්ත්වය මත තැන්පත්කරුවන්ට අ‍යත් තැන්පතු ආපසු ගෙවීමේ දුෂ්කරතා හේතුකොට ගෙන ශ්‍රී ලංකා මහ බැංකුවේ මුදල් මණ්ඩලය විසින් ආයතනයේ මෙහෙයුම් කටයුතු සීමා කරමින් විධාන කීපයක් 2018.01.02 වන දින නිකුත් කරන ලදී. තවද, ආයතනය විසින් ඉදිරිපත් කරන ලද යෝජනාවක් සලකා බැලීමෙන් අනතුරුව තැන්පත්කරුවන්ට මුදල් ගෙවීමේ මූලික අරමුණින් ඊ ටී අයි ෆිනෑන්ස් ලිම්ටඩ් ආයතනයේ හඳුනාගත් පාලිත සමාගම්, උප පාලිත සමාගම් ඇතුළු ආයෝජන වත්කම් ඇමෙරිකානු ඩොලර් මිලියන 75 ක සමස්ථ වටිනාකමකට විකිණීමට මුදල් මණ්ඩලය විසින් එකඟතාවය ලබා දෙන ලදී.

වාරික 4 ක් වශයෙන් ලද එම මුදල වූ ඇමෙ‍රිකානු ඩොලර් මිලියන 70 ක වටිනාකමට අදාලව ඊ ටී අයි ෆිනෑන්ස් ලිමිටඩ් ආයතනයේ වත්කම් ගැණුම්කරුවා‍ වෙත පැවරීමෙන් අනතුරුව එම ගනුදෙනුව අවසන් කෙරී ඇත. ගැණුම්කරුවා ඉතිරි ඇමෙරිකානු ඩොලර් මිලියන 5 ප්‍රේෂණය නොකිරීම හේතුවෙන් එම වටිනාකමට අදාළව පැවරීමට නියමිත වූ පාලිත සමාගමක් වන ස්වර්ණමහල් ෆිනෑන්ෂියල් සර්විසස් පී එල් සී සමාගම, ඊ ටී අයි ෆිනෑන්ස් ලිමිටඩ් ආයතනය භාරයේ තවදුරටත් රඳවා තබා ගන්නා ලදී. දැනට ශ්‍රී ලංකා මහ බැංකුව, ඊ ටී අයි ෆිනෑන්ස් ලිමිටඩ් ආයතනය සහ ස්වර්ණමහල් ෆිනෑන්ෂියල් සර්විසස් පී එල් සී සමාගම එකතුව එකී සමාගම් ප්‍රතිව්‍යුහගත කිරීම සඳහා විකල්ප පියවර සලකා බලමින් පවතී. ගනුදෙනුව සම්පූර්ණයෙන් නිම නොවුවද හිඟ ඇමෙරිකානු ඩොලර් මිලියන 5 ට අදාළව සවර්ණමහල් ෆිනෑන්ෂියල් සර්විසස් පී එල් සී සමාගම රඳවා තබාගත් නිසා ඊ ටී අයි ෆිනෑන්ස් ලිමිටඩ් ආයතනය වෙත මූල්‍යමය අලාභයක් සිදු වී නොමැත.

ඉහත කී වාරික 4 ට අදාලව මුදල් ලද අවස්ථාවේ දී පැවති විනිමය අනුපාත පදනම් කරගෙන ඊ ටී අයි ෆිනෑන්ස් ලිමිටඩ් සමාගම වෙත මේ වන විට රුපියල් බිලියන 11 ක් ලැබී ඇත. එම මුදල් වලින් උපචිත පොළිය ද සමග තැන්පත්කරුවන්ට තැන්පතු මුදල්වලින් 20% ක් මේ වන විට ආපසු ගෙවා ඇත. තවත් 10% ක් තැන්පත්කරුවන්ට ගෙවීම දැනට සිදු වෙමින් පවතී.

ඒ අනුව ඊ ටී අයි ෆිනෑන්ස් ලිමිටඩ් ආයතනය රුපියල් බිලියන 10 කට වැඩි ප්‍රමාණයක් තැන්පත්කරුවන්ට ගෙවීම සිදු කරන ලබනුයේ ශ්‍රී ලංකා රජ‍යේ, ශ්‍රී ලංකා මහ බැංකුවේ හෝ ශ්‍රී ලංකා තැන්පතු රක්ෂණ හා ද්‍රවශීලතා අධාරක වැඩසටහනෙන් කිසිඳු මූල්‍යමය ආධාරයක් ලබා නොගෙන බව ශ්‍රී ලංකා මහ බැංකුව අවධාරණය කර සිටී.

ඊ ටී අයි ෆිනෑන්ස් ආයතනය අරඹයා කලින් කලට ගත් විවිධ නියාමන ක්‍රියාමාර්ගවල ප්‍රතිඵලයක් වශයෙන්, ආයතනයේ සෘණ ශුද්ධ වත්කම් ආවරණය කිරීම සඳහා අධ්‍යක්ෂවරුන් විසින් ඊ ඒ පී බ්‍රෝඩ්කාස්ටින්ග් කම්පැනි ලිමිටඩ් සහ ස්වර්ණමහල් ජුවෙලර්ස් ඇතුළු පෞද්ගලික වත්කම් පැවරීමට අමතරව තවත් අතිරේඛ පෞද්ගලික වත්කම් පැවරීම සඳහා පොරොන්දු ලිපියක් ලබා දී ඇත.

තැන්පත්කරුවන්ට මෙම මුදල් ප්‍රමාණය ගෙවීමට හැකි වූයේ ඊ ටී අයි ෆිනෑන්ස් ලිමිටඩ් ආයතනයේ විකිණූ වත්කම්වලින් වන අතර එසේ සිදු වූයේ ඊ ටී අයි ෆිනෑන්ස් ලිමිටඩ්

ආයතනයේ පැවති ගැටළු හඳුනාගෙන ගත් නියාමන ක්‍රියාමාර්ග හේතුකොටගෙන බව ශ්‍රී ලංකා මහ බැංකුව තවදුරටත් අවධාරණය කර සිටී. තවද, මේ වන විටත් ශ්‍රී ලංකා මහ බැංකුව විසින් ඊ ටී අයි ෆිනෑන්ස් ලිමිටඩ් ආයතනයේ අධ්‍යක්ෂවරුන්ගේ පෞද්ගලික වත්කම් ඊ ටී අයි ෆිනෑන්ස් ලිමිටඩ් ආයතනය වෙත පවරා ගැනීම සඳහා නීතිමය ක්‍රියාමාර්ග කිහිපයක් ම ගෙන ඇත.

ආයතන ප්‍රතිව්‍යුහගත කිරීම සඳහා වන යෝජනා අදාල සමාගම් මාර්ගයෙන් ආයෝජකයින් විසින් ඉදිරිපත් කර ඇති අතර ඒවා පුළුල් වශයෙන් සලකා බලා, එ‍ම‍ යෝජනා ක්‍රියාත්මක කිරීම සම්බන්ධයෙන් වන ප්‍රගතීන් ඊ ටී අයි ෆිනෑන්ස් ලිමිටඩ් ආයතනය සහ ස්වර්ණමහල් ෆිනෑන්ෂියල් සර්විසස් පීඑල්සී ආයතනවල තැන්පත්කරුවන් වෙත සන්නිවේදනය කරනු ලබන බව ශ්‍රී ලංකා මහ බැංකුව දැනුම් දී සිටී.