විදේශයෙන් වාහන ගෙන්වන බව පවසා මුදල් වංචා කළ සැකකරුවෙකු අත්අඩංගුවට

වෙළඳපොලේ මිලට වඩා අඩුවෙන් විදේශ රටවලින් සුඛෝපභෝගී වාහන ගෙන්වා දෙන බව පවසා රුපියල් කෝටි  ගණනාවක් මුදල් වංචා කිරීම සම්බන්ධයෙන් වරෙන්තු රැසක් ලැබූ  පුද්ගලයෙක් බත්තරමුල්ල ප්‍රදේශයේ දී අත්අඩංගුවට ගැනීමට  හැකිවූ බව හෝමාගම විශේෂ අපරාධ විමර්ශන අංශය කියයි.

අත්අඩංගුවට ගත් මෙම පුද්ගලයාට එරෙහිව අපරාධ පරීක්ෂණ දෙපාර්තමේන්තුවේ මෙන්ම මිරිහාන විශේෂ අපරාධ විමර්ශන අංශයේ  පැමිණිලි  ගණනාවක් ඇති අතර ඒ සම්බන්ධයෙන් සැකකරුට අධිකරණ කීපයකින් විවෘත වරෙන්තු පවා නිකුත් කර ඇතැයි පොලිසිය කියයි.

මාලඹේ ප්‍රදේශයේ පුද්ගලයෙකුට සුඛෝපභෝගී මෝටර් රථයක් ආනයනය කර දෙන බව පවසා රුපියල් හතළිස් එක්ලක්ෂ අසූ දහසක මුදලක් වංචා කිරීම සම්බන්ධයෙන්  කඩුවෙල අධිකරණයේ හෝමාගම විශේෂ අපරාධ විමර්ශන අංශය මගින් ගොනුකළ නඩුවකට සැකකරු  පෙනී නොසිටීම හේතුවෙන් ඔහු  නොමැතිව නඩුව විභාග කළ අධිකරණය සැකකරුට වසර 2 ක සිර දඬුවමක්  සහ පැමිණිලිකරුට  ලක්ෂ 10 ක වන්දි මුදලක් ගෙවන ලෙස ඉකුත්  මාර්තු  මස 12 වැනි දින නියෝග කර තිබූ බව පොලිස් නිලධාරියෙක් පැවැසීය.

විවිධ පුද්ගලයාගේ මුදල් ලබාගෙන තිබූ මෙම සැකකරු ව්‍යාජ ලිපිනයන් ඔවුන් වෙත ලබාදී තැනින් තැන සැඟව සිට මග හැර  මම වංචාව සිදුකර තිබූ බව පොලිසිය කියයි

අත්අඩංගුවට ගත් සැකකරු අධිකරණය වෙත ඉදිරිපත් කිරීමට නියමිතය.

බිමල් ශ්‍යාමන්