යාපනයේ නාවන්තුරේ ප්‍රදේශයේ අනවසර පදිංචි කිරීමට එරෙහිව විරෝධතා

යාපනයේ නාවන්තුරේ ප්‍රදේශයේ පිහිටි මාතා කෝවිල ඇතුළු විශාල ඉඩම් ප්‍රදේශයක මුස්ලිම් වැසියන් පදිංචි කරවීමට පියවර ගෙන ඇතැයි  කියමින් එයට විරෝධය පා දෙමළ වැසියන් පිරිසක් ඊයේ (24) දින විරෝධතාවයක නිරත වූහ.

විරෝධතාවය පැවති ස්ථානයට ප්‍රාදේශීය ලේකම් එස්. සුදර්ශන් මහතා සහ නාවන්තුරේ ග්‍රාම නිලධාරීවරයා පැමිණ විරෝධතාකරුවන් සමග සාකච්ඡා කොට තත්ත්වය පාලනය කිරීමට උත්සාහ ගත් අවස්ථාවේදී එම ස්ථානයට පැමිණි මෞලවිවරයෙකු එම මුළු භූමියම අයත් වන්නේ මුස්ලිම් වැසියන්ට බවත් එම ඉඩම් සියල්ලම රජය විසින් බලපත්‍ර මගින් ඔවුන් වෙත ලබා දී ඇති බව ප්‍රකාශ කිරීමත් සමගම යළිත් විරෝධතාකරුවන් අතර නොසන්සුන් තත්ත්වයක් ඇතිව තිබේ.

එහිදී ගම්වාසීන් විසින් එම ඉඩම් මුස්ලිම් වැසියන්ට ලබා දීම සම්බන්ධයෙන් ප්‍රාදේශීය ලේකම්වරයාට හා ග්‍රාම නිලධාරීවරයාට විරෝධතාවය පෑ අතර එහිදී අදාළ  ඉඩම් සදහා මුස්ලිම් වැසියන්ට ලබා දී ඇතැයි කියන බලපත්‍රද රැගෙන ලබන 26 වෙනිදා යාපනය ප්‍රාදේශීය ලේකම් කාර්යාලයට පැමිණෙන ලෙස මුස්ලිම් වැසියන්ට දැනුම් දී ඇති අතර එදිනට නාවන්තුරේ ග්‍රාම සංවර්ධන සමිතිය ඇතුළු ප්‍රධාන සමිති කීහිපයක නිලධාරීන්ටද පැමිණෙන ලෙස දැනුම් දීමෙන් තත්ත්වය පාලනය වී ඇත.