තොණ්ඩමන්, දිගම්බරන්, රාධා ක්‍රිෂ්ණන්ලාගේ දේශපාලනය වතුකරයෙන් ඉවර කරනවා

ජනපති අනුරකුමාර දිසානායක මහතා නුවරඑළිය දිස්ත්‍රික්කයේ යටිතල පහසුකම් නංවාලීමට වෙනත් දිස්ත්‍රික්කවලට වඩා වැඩි මුදල් ප්‍රතිපාදන වෙන් කර ඇති බවත්, එම මුදල් වලින් වතුකරයේ වැඩිම නිවාස ඉදි කිරිම්, පානීය ජලය ලබා දීම ඇතුලු වතුකරයේ යටිතල පහසුකම් නංවාලිම මේ වසර අවසන්වන විට සිදු කර අවසන් කරන බව නුවරඑළිය දිස්ත්‍රික් සම්බන්ධිකරණ කමිටුවේ සභාපති සහ නුවරඑළිය දිස්ත්‍රික් පාර්ලිමේන්තු මන්ත්‍රී මංජුල සුරවීරආරච්චි මහතා පැවසීය.

මන්ත්‍රී මංජුල සුරවීරආරච්චි මහතා (20) දින කියා සිටියේ, කොටගල රිතිෂ් ශාලාවේ පැවති තරුණ සම්මේලනය අමතමිනි.

මෙහිදි වැඩි දුරටත් අදහස් දැක්වූ මංජුල සුරවීආරච්චි මහතා කියා සිටියේ, මෙතෙක් වතුකරයේ ජනතාවට බොරු පොරොන්දු ලබා දෙමින් ඉන්දියාවේ දමිළ චිත්‍රපටවල නළුවන් සේ රග දක්වන තොන්ඩමන්, දිගම්බරම් සහ රාධාක්‍රිෂ්නන් යන දේශපාලඥයින් වතුකරයෙන් සහ මේ රටෙන් පන්නා දමන්නේ වතුකරයේ තරුණ ප්‍රජාව ජාතික ජන බලවේගය සමග එක්ව බවයි මංජුල සුරවීරආරච්චි මන්ත්‍රීවරයා කියා සිටියේ.

තවද, හැටන් ප්‍රදේශයේ කාලයක් තිස්සේ නොවිසදුනු ගැටළුවලට වත්මන් රජය යටතේ විසදුම් සෙවීමේදි ගිලිහි යන එම දේශපාලනය රැක ගැනීමට වතු ප්‍රජාවට බොරු ගොතමින් එම දේශපාලඥයින් කටයුතු කරන බවත්, එම දේශපාලඥයින්ගේ එම රැවටිලි වලට වතුකරයේ තරුණ ප්‍රජාව සහ වතු කම්කරුවන් කිසිසේත් හසු නොවන බවයි මන්ත්‍රීවරයා කියා සිටියේ.

රටේ අනෙකුත් දිස්ත්‍රික්කවලට සාපේක්ෂව පසුගිය වකවානුව තුල අඩුම සංවර්ධන කටයුතු සිදු වී ඇත්තේ නුවරඑළිය දිස්ත්‍රික්කයේ බවත්, එය ඉදිරියේදි වැඩිම සංවර්ධනයක් සිදු කල දිස්ත්‍රික්කය නුවරඑළිය දිස්ත්‍රික්කය බවට පත් කරන බවද මංජුල සුරවීරආරච්චි මහතා මෙහිදි වැඩි දුරටත් පැවසීය.