මැලේසියාව ජුනි 7දා දක්වා රටම ලොක්ඩවුන් කරයි

කොරෝනා වෛරසය ආසාදිතයන් වැඩිවීම වැළැක්වීමේ උත්සාහයක් ලෙස මැලේසියාවේ අග්‍රාමාත්‍යවරයා එලැඹෙන බදාදා දිනයේ සිට ජුනි 7දා දක්වා රටපුරා ලොක්ඩවුන් සීමා ප්‍රකාශයට පත්කළ බව එරට මාධ්‍ය වාර්තා කරයි.

මැලේසියාවේ අග්‍රාමාත්‍ය මුහයිඩින් යසින් විසින් මෙම ලොක්ඩවුන් නියෝගය සංචරණ පාලන නියෝගයක් ලෙස  හඳුන්වා ඇත්තේ, වසංගතයේ තෙවැනි රැල්ල සමග මැලේසියාව ජාතික අර්බුදයක් කරා යොමුවනු ඇති බව පවසමිනි.

මැලේසියාවේ දෛනික කොවිඩ්-19 ආසාදන සඳුදා වනවිට 4,000ක් ඉක්මවා ඇති බව අග්‍රාමාත්‍යවරයා පැවසීය. සක්‍රීය කොරෝනා රෝගීන් 37,390ක් සිටින අතර, මැයි 10 වනවිට මියගිය සංඛ්‍යාව 1,700කි.

රටේ සෞඛ්‍ය ක්ෂේත්‍රයේ යටිතල ව්‍යුහයට බලපෑම් කළ හැකි ඉහළ ආසාදන අනුපාතයන් සහිත නව ප්‍රභේදයන් බිහිවීම ගැන යසින් අනතුරු ඇඟවීය.

රටපුරා ලොක්ඩවුන් සීමා යටතේ අන්තර් රාජ්‍ය හා අන්තර් දිස්ත්‍රික් සංචරණ සමග සියලුම සමාජ රැස්වීම් තහනම් කෙරේ.

අවන්හල්වල ආහාර ගැනීමට ඉඩ නොදෙන අතර, රැගෙන යාමට පමණක් අවසර ඇත. අගුලු දැමීමේදී මංගල උත්සව හෝ සමාජ ක්‍රියාකාරකම් සඳහා අවසර නැත. අධ්‍යාපන ආයතනද වසා ඇත.

මැලේසියාව තවමත් හදිසි තත්ත්වයක් ප්‍රකාශයට පත්කර ඇති අතර, වසංගතය පාලනය කිරීම සඳහා අගමැති විසින් ජනවාරි මාසයේදී එය ප්‍රකාශයට පත් කළේය.

මැලේසියාවේ පළමු වරට රට පුරා ලොක්ඩවුන් සීමා පනවනු ලැබුවේ 2020 මාර්තු 18 සිට මැයි 3දා දක්වාය.