මෙරට පළමු පුරාණ තාක්ෂණ කෞතුකාගාරය හෙට ජනපති අතින් ජනතා අයිතියට

මෙරට පළමු පුරාණ තාක්ෂණ කෞතුකාගාරය සහ පුස්තකාලය ජනාධිපති මෛතී‍්‍රපාල සිරිසේන මහතාගේ  ප‍්‍රධානත්වයෙන් හෙට (03)  පොළොන්නරුවේ දී විවෘත කෙරේ.

නූනත යුගයට ගැළපෙන නවීන තාක්ෂණය යොදාගෙන මිනිස් සංහතිය සතු වූ ඉපැරණි තාක්ෂණය අද වෙසෙන ජනතාවට අවබෝධ කර දීමක් ලෙස මෙම කෞතුකාගාරය හැඳින්විය හැකි අතර මෙය මෑතකාලීනව සිදු කෙරුණු විශාලතම ව්‍යාපෘතියකි.

පෞරාණික දේශීය තාක්ෂණයට අයත් කෞතුක භාණ්ඩ එක් රැස්කිරීම හා ඒවා මතු පරපුරට සංරක්ෂණය කිරීම ද මෙම කෞතුකාගාරය පිහිටුවීමේ අරමුණ වී තිබෙන අතර, වත්මන් තාක්ෂණික යුගයට අයත් නවීනතම කෞතුකාගාරයක තිබිය යුතු අංගෝපාංගවලින් මෙම කෞතුකාගාරය සමන්විත ය.

මෙය ප‍්‍රධාන මහල් 03කින් සමන්විත අතර බිම් මහලෙන් නරඹන්නන්ට පොළොන්නරු යුගය පිළිබඳ කෙටි හැඳින්වීමක් ලබා දෙමින් එම යුගයට අයත් කෞතුක භාණ්ඩ ප‍්‍රදර්ශනය කර තිබේ.

බිම් මහල  මැදිරි 04කින් සමන්විත වන අතර පළමු මැදිරිය පොළොන්නරු යුගය පිළිබඳව ද, දෙවන මැදිරිය ප‍්‍රාග් හා පූර්ව ඓතිහාසික තාක්ෂණය පිළිබඳ  විස්තර කරමින් ද, තුන්වන මැදිරිය මැටි බදුන් හා ලෝහ තාක්ෂණය ද, සිවු වන මැදිරිය කෘෂි හා වාරි තාක්ෂණය වෙනුවෙන් ද වෙන් වි තිබේ.

පළමු මහලේ මැදිරි වෙන් වි ඇත්තේ ගොඩනැගිලි තාක්ෂණය, බිතු සිතුවම්, මූර්ති හා දැව තාක්ෂණය සහ රෙදිපිළි, නාවුක හා ගණිත මිණිත තාක්ෂණ මැදිරි ලෙසිනි. පළමු මහල දේශන ශාලාවකින් ද, කි‍්‍රයාකාරකම් මැදිරියකින් ද, නව්‍යකරණ මධ්‍යස්ථානයකින් හා සමරු ප‍්‍රකාශන අලෙවි සැලකින් සමන්විත වන අතර පුස්තකාලයක් සහ දේශන ශාලාවක් ද දෙවන මහලට අයත් වේ.

නව්‍යකරණ මැදිරියෙන් සීගිරි ජේතවන  ආදි පෞරාණික ස්ථානවල ති‍්‍රමාන රූප නිරූපණය කරන අතර විදේශීය කෞතුකාගාරවල මෙන්ම මෙම පුරාවිද්‍යා ස්ථානවල සජීවි ව හිද ඡායාරූප  ගතහැකි අයුරින් තාක්ෂණය යොදා ඇත.

ඒ සියලූ පහසුකම්වලින් සුසැදි ශ‍්‍රවණාගාරයක්, ග‍්‍රන්ථ ප‍්‍රකාශන අලෙවිහලක් හා සිහිවටන භාණ්ඩ අලෙවිහලක් මෙහි දැකගත හැකි වේ.

එහි විකිණිමට ඇති සිහිවටන භාණ්ඩ සුවිශේෂී වන්නේ ඒ සියල්ල තල්පත්වලින් නිම වූ සිහිවටන වීමයි. මෙම තාක්ෂණ කෞතුකාගාරය සතු පුස්තකාලය කොළඹ ජාතික කෞතුකාගාර පුස්තකාලයේ දිගුවක් වන අතර එහි විශේෂත්වය වන්නේ පොත් බැහැර කිරිමේ අංශයක් ද කි‍්‍රයාත්මක වීමයි.

ස්වයං අධ්‍යයනය භාෂා තුනෙන්ම මෙය කි‍්‍රයාත්මක වන අතර මෙම කෞතුකාගාරය විදේශිකයන්ට ද පහසුවෙන් පරිහරණය කිරීමට හැකියාව පවතී.

පාසල්, විශ්වවිද්‍යාල සිසුන්ට හා පර්යේෂකයන්ට මෙන්ම සාමාන්‍ය ජනතාවට ද විශාල ප‍්‍රයෝජනයක් අත්කර දෙමින් ජනාධිපති  මෛතී‍්‍රපාල සිරිසේන මහතාගේ  සංකල්පයක් මත පිබිදෙමු පොළොන්නරුව දිස්ති‍්‍රක් සංවර්ධන වැඩසටහන යටතේ ඉදිකරන ලද පුරාණ තාක්ෂණ කෞතුකාගාරයේ සියලු  කටයුතු කෞතුකාගාර දෙපාර්තමේන්තුවේ අධීක්ෂණය යටතේ සිදුවන අතර මේ සඳහා වැය කර ඇති මුදල රුපියල් මිලියන 900කි.

කෂිනි හපුආරච්චි