මෙම වර්ෂයේදි වගා හානි වුවන්ට ඉක්මණින් වන්දි මුදල් දෙනවා - හැරිසන්

2019 මහ කන්නයේ වගා හානි සඳහා වන්දි මුදල් මේ වසරේ දෙසැම්බර් මසට පෙර ගොවීන් සඳහා ගෙවීමට හැකියාවක් ඇති බව කෘෂිකර්ම, ග්‍රාමීය ආර්ථික කටයුතු, වාරිමාර්ග සහ ධීවර හා ජලජ සම්පත් සංවර්ධන අමාත්‍ය පී.හැරිසන් මහතා පැවසීය.

2018 යල කන්නයේ වගා හානි වූ ගොවීන් වෙනුවෙන්  පැවැති වන්දි  ප්‍රදානයට එක්වෙමින් අමාත්‍යවරයා මේ බව පැවසීය.

එහිදී වැඩිදුරටත් අදහස් දැක්වූ අමාත්‍යවරයා,

“2018 වසරේ සිට අපි පළමු වරට ගොවියාට රක්ෂණ වාරිකයක්වත් නොමැතිව අක්කරයක්  සඳහා වගා හානි වන්දිය 40‚000 ක මුදලක් ගෙවීමට සමත් වුණා. එවකට අක්කරයක හානි වන්දි  මුදල පැවැතියේ රුපියල් දස දහසක් එයද හතරගුණයකින් ඒ කියන්නේ රුපියල් හතලිස්දහසක් දක්වා ගෙවන්නේ මේ පළමුවරට වීම ගැන මම සතුටු වෙනවා. අපි දැනට ලංකාවේ හානිවූ වගාබිම් අක්කර 23‚366 සඳහා ගොවීන් 20‚366 කට රුපියල් මිලියන 559 ක මුදලක් ගෙවා තිබෙනවා.

ඒ වගේම මම බලාපොරොත්තු වෙනවා 2018 - 2019 මහ කන්නයට අදාලව හානිවූ ගොවිබිම්  වෙනුවෙන් වන්දි ප‍්‍රදානය කරන්න. ඒ සඳහා මුදල් වෙන්කිරීමට අවශ්‍ය කටයුතු මේ දිනවල අපි සකස් කරමින් පවතිනවා. ආසන්න වශයෙන් මහ කන්නයේ අක්කර 50‚000ක් සදහා ගොවීන් 30‚000ක් වෙනුවෙන් රුපියල් මිලියන 1‚100ක මුදලක් වැයවෙතැයි මා අපේක්ෂා කරනවා.

එම වගාහානි මුදල ද අපි විසින් ලබා දීමෙන් ඉතිහාසගත වන්නේ ගොවියාට වගාහානි වන්දි කඩිනමින්ම ලබාදුන් පළමු රජය ලෙස අප එක්වෙමින්” යැයි අමාත්‍යවරයා වැඩිදුරටත් පැවසීය.