මානසික සෞඛ්‍ය සේවාවට ප්‍රතිපත්තියක් - පවිත්‍රා
මානසික සෞඛ්‍ය සේවාවේ ගුණාත්මකභාවය ඉහළ නැංවීමට සෞඛ්‍ය ප්‍රතිපත්තියක් සකසන බව සෞඛ්‍ය අමාත්‍ය පවිත්‍රා වන්නිආරච්චි මහත්මිය පවසයි.
අමාත්‍යතුමිය මෙම අදහස් පළ කරන ලද්දේ මනෝචිකිත්සක වෛද්‍යවරුන්ගේ විද්‍යායතනයේ 17 වන වාර්ෂික අධ්‍යයන සැසිවාරයේ සමාරම්භක උත්සවයට එක්වෙමෙනි.
ශ්‍රී ලංකා මනෝචිකිත්සක වෛද්‍යවරුන්ගේ විද්‍යායතනය 2003 වසරේ ආරම්භ කරන ලද අතර, විද්‍යාලයේ දැක්ම වන්නේ මානසික දියුණුව ප්‍රවර්ධනය කිරීම වන අතර, එහිදී සෞඛ්‍ය සහ ඒ ආශ්‍රිත විද්‍යාවන්, මානසික සෞඛ්‍යයට අදාළ පර්යේෂණ ප්‍රවර්ධනය කිරීම, වෛද්‍ය පුහුණුවට පහසුකම් සැපයීම, මනෝ චිකිත්සාව පිළිබඳ උපාධි අපේක්ෂකයින් සහ පශ්චාත් උපාධිධාරීන් බවට විද්‍යායතනයේ වෛද්‍යවරුන් පත් කිරීම සිදු කරනු ලබයි.
මෙහිදී අදහස් දැක්වූ සෞඛ්‍ය අමාත්‍යතුමිය -
“මානසික සෞඛ්‍ය ක්ෂේත්‍රයේ වැදගත් අංගයක් ලෙස මානසික ආබාධිත පුද්ගලයින් රැකබලා ගන්නා මනෝචිකිත්සාව පෙන්වා දිය හැකියි. මානසික ආබාධිත පුද්ගලයින්ට ගෞරවයෙන් සැලකිය යුතු වෙනවා. අප ප්‍රජාව තුළ ප්‍රවර්ධනය කළ යුතු කරුණක් ලෙස මානසික ආබාධිත පුද්ගලයින්ට, හෘදරෝග , අධි රුධිර පීඩනය හෝ දියවැඩියාව ඇති පුද්ගලයින්ට මෙන්ම දයානුකම්පාවෙන් යුක්තව සැලකිය යුතු වෙනවා.”
මානසික සෞඛ්‍ය සේවාවේ ගුණාත්මකභාවය ඉහළ නැංවීමට සෞඛ්‍ය ප්‍රතිපත්තියක් සකස් කරනවා. ඒ සදහා වන කටයුතු ඉදිරියේ සිදු කිරීමට මා බලාපොරොත්තු වෙනවා. සෞඛ්‍ය අමාත්‍යාංශය විසින් ලබාදෙන සෞඛ්‍ය සේවාවන් දිවයිනේ ප්‍රධාන රෝහල්වලට පමණක් සීමා නොකොට සියලු ජනතාව ඉලක්ක කර ගනිමින් පුළුල් කර තිබෙනවා. දිස්ත්‍රික් මට්ටමේ බොහෝ රෝහල්වල අපි මනෝචිකිත්සකයින් පමණක් නොව, මනෝචිකිත්සාව පිළිබඳ ඩිප්මලෝමාව ලබා ඇති වෛද්‍ය නිලධාරීන් ද සේවයේ යොදවා තිබෙන බව සතුටින් ප්‍රකාශ කරන්න කැමතියි. ඒ අනුව අපට ජනතාවට සමීප සෞඛ්‍ය සේවාවක් ලබාදීමට හැකියාව ලැබී තිබෙනවා. දිවයිනේ සියලුම දිස්ත්‍රික්ක වල මනෝචිකිත්සක සත්කාර වැඩි දියුණු කිරීම සඳහා ශ්‍රී ලංකා මනෝචිකිත්සක විද්‍යාලය සෞඛ්‍ය අමාත්‍යාංශයට විශාල සහයෝගයක් ලබා දී තිබෙනවා. විවිධ තත්ත්වයන් යටතේ මනෝචිකිත්සකයින් විසින් කරනු ලබන සේවාවන් මම බෙහෙවින් අගය කරනවා. සියලු සංවර්ධිත රටවල මනෝ වෛද්‍යවරුන් වශයෙන් ඔබට විශාල ඉල්ලුමක් තිබියදීත් ඔබගෙන් බොහෝ දෙනෙක් මව්බිමට සේවය කිරීමට නැවත පැමිණ තිබීම සතුටට කරුණක්. වඩා හොඳ හා නවීකරණය කරන ලද මනෝචිකිත්සක සේවාක් ලබාදීමට දිවයින පුරා පිහිටි සෞඛ්‍ය ආයතනවල මනෝචිකිත්සක ඒකක සංවර්ධනය කිරීම සඳහා සෞඛ්‍ය අමාත්‍යවරිය වශයෙන් මාගේ උපරිම සහයෝගය ලබා දෙනවා”.
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
