ප්‍රංශය ලොක්ඩවුන් කරයි

කොවිඩ්-19 හෙවත් නව කොරෝනා වෛරසය පැතිරයාම හේතුවෙන් දින 15ක් සඳහා ප්‍රංශය වසාදැමීමට (ලොක්ඩවුන්) ජනාධිපති එමානුවෙල් මැක්‍රොන් පියවර ගෙන තිබේ.

ඒ අනුව එදිනෙදා අත්‍යවශ්‍ය භාණ්ඩ මිලදී ගැනීම, රැකියාවට යාම, ව්‍යායාම කිරීම හෝ වෛද්‍ය ප්‍රතිකාර ලබා ගැනීම හැර අඟහරුවාදා සිට මිනිසුන් නිවසේ සිටිය යුතු බව මැක්‍රොන් අවධාරණය කළේය.

මේ අතර වෛරසය වැළැක්වීම සඳහා මිනිසුන් ගමන් බිමන් යාමේ සීමාවන්ට යටත් වන බව සහතික කිරීම සඳහා ප්‍රංශය පොලිස් නිලධාරීන් 100,000  යොදවනු ඇතැයි එහි අභ්‍යන්තර කටයුතු අමාත්‍යවරයා පවසයි.

ක්‍රිස්ටෝෆ් කැස්ටනර් පැවසුවේ තම නිවෙස්වලින් පිටත ව්‍යාපාර කරන පුද්ගලයන්ට එසේ කිරීමට හේතුව සාධාරණීකරණය කළ යුතු බවයි.

මාධ්‍ය අමතමින් ඔහු කියා සිටියේ නීති රීති කඩ කළහොත් ඔවුන්ට දඩ මුදල් ගෙවීමට සිදුවනු ඇති බවයි.

නිවස සහ රැකියාව අතර ගමන් කිරීම ඇතුළුව සමහර තත්වයන් යටතේ යම් සහන ලබාදීම සිදුකරන බව කැස්ටනර් සඳහන් කළේය.

“බොහෝ අය තවමත් ලබා දී ඇති සෞඛ්‍ය උපදෙස් නොසලකා හරිනවා” කැස්ටනර් අවධාරණය කළේය.

ඔහු මාධ්‍ය ඇමතුවේ ප්‍රංශ ජනාධිපති එමානුවෙල් මැක්‍රොන් විසින් කොරෝනා වෛරස් පැතිරීම වැළැක්වීම සඳහා නිර්මාණය කරන ලද දැඩි නව ක්‍රියාමාර්ග මාලාවක් එළිදැක්වීමෙන් අනතුරුවය.