කොරෝනාවෙන් සුව වුවත් නැවත වැළඳිය හැකියි - GMOA

කොරෝනා වෛරසය ශරීරගත වූ පිරිස් සුව වූ පසුවත් නැවත එම රෝගය අදාළ පුද්ගලයාට වැළඳිය හැකි බවට චීන විශේෂඥයින් සොයාගෙන තිබෙන බව රජයේ වෛද්‍ය නිලධාරීන්ගේ සංගමය සඳහන් කරයි.

මෙය ඉතා භයානක තත්ත්වයක් බවත්, මෙම හෙළිදරව්වත් සමග රෝගයේ බරපතල තත්ත්වය පෙන්නුම් කරන බවද එම සංගමයේ ලේකම් වෛද්‍ය හරිත අලුත්ගේ මහතා සඳහන් කළේය.

ලංකාව තුළ රෝගය පාලනය කිරීමට කටයුතු කර තිබෙන බවත්, ලංකාව තුළදී කොරෝනා වෛරසය ශරීරගත වූ චීන ජාතික කාන්තාවක් සොයාගත් බවත් එම රෝගියා මීට දින පහළොවකට පෙර සොයාගත් බවද වෛද්‍ය අලුත්ගේ කියා සිටියේය.

පොදුවේ සැලකීමේදී 2003 වසරේදී චීනයේ පැතිර ගිය සාර්ස් රෝගය නිසා පුද්ගලයින් අටදහස් අනූහයක් රෝගීන් බවට පත්වූ බවත්, එහෙත් කොරෝනා වෛරසය මේ වන විට පුද්ගලයින් හතළිස් දහසකට (40,000) අධික පිරිසකට ශරීරගත වී තිබෙන බවත් ඔහු සඳහන් කළේය.