උතුර පුරා ඇළවෙන පෝස්ටර්

නැවත ත්‍රස්තවාදයක් හෝ ආයුධ කල්ලි හෝ පාතාලයක් උතුරු පළාතට එපා කියමින් කිළිනොච්චියේ ප්‍රදේශ කිහිපයක අද දින පෝස්ටර් අලවා ඇති බවට කිළිනොච්චි වැසියෝ කියා සිටිති.

මඩකලපුව වව්නිතිව් ප්‍රදේශයේදී පොලිස් නිලධාරීන්ට වෙඩි තැබීම සම්බන්ධයෙන් සැකපිට අත්අඩංගුවට ගත් සැකකරුගේ ගම්මානයේ වන වඩ්ඩකච්චි ප්‍රදේශයේත් විශ්වමඩු ප්‍රදේශයේ සහ කිළිනොච්චිය නගරයේ ජනතාව ගැවසෙන පොදු ස්ථාන වලදී මෙම පෝස්ටර් කිසියම් පිරිසක් විසින් දමිළ භාෂාවෙන් අලවා ඇත.

අදාළ පෝස්ටර් මගින් ජනතාවට පෙන්වා දී ඇත්තේ වසර 30ක යුද්ධය හේතුවෙන් පීඩා විඳි ජනතාවට නැවත යුද්ධය දකින්න නොලැබේවා සහ යුද්ධයෙන් බැට කෑ ජනතාවට නැවත ආයුධ කල්ලි දකින්නට නොලැබේවා සහ විවිධ හේතූන් නිසා හිස ඔසවා ඇති පාතාල මැඩලීමට රටේ ඇති ආරක්ෂක අංශ වෙතට සහය ලබා දෙන ලෙසටය.