ඉන්දුනීසියා භූ කම්පන හා සුනාමි මරණ 832ක් දක්වා ඉහළට

ඉන්දුනීසියාවේ සුලවේසි දූපත ආශ්‍රිතව ඇති වූ භූ කම්පනය සහ සුනාමි ව්‍යසනයෙන් මියගිය පිරිස 832ක් දක්වා ඉහළ ගොස් ඇති බව විදෙස් වාර්තා පවසයි.

මුලින් සඳහන් කළ තොරතුරුවලට වඩා මේ වනවිට සිද්ධියෙන් වූ හානිය වඩාත් දරුණු බව බලධාරීහු පවසති.

රික්ටර් පරිමාණ 7.5ක භූ කම්පනය හේතුවෙන් වඩාත් හානියට පත් ප්‍රදේශය පාලූ ලෙස සැලකෙන අතර, කලින් සඳහන් කළ මීටර් 2ක උදම් රළ මීටර් 6ක් උසට එම ප්‍රදේශයට පැමිණ ඇති බවද මේ වනවිට වාර්තා වෙයි.

මේ අතර, සිද්ධියෙන් තවත් 500කට අධික පිරිසක් තුවාල ලබා ඇති අතර, අතුරුදන් වූ පිරිස් සොයා සිදුකරන මෙහෙයුම්ද කඩිනම් කර තිබේ.

ඉන්දුනීසියාවේ ප්‍රබල භූ කම්පනයක් සහ සුනාමි තත්ත්වයක් ඇති වූ සුලවේසි දූපත ආශ්‍රිතව තවත් ප්‍රබල පසු කම්පන කිහිපයක් ඇතිව තිබේ.

පසුගිය සිකුරාදා රික්ටර් පරිමණ 7.5ක් ලෙස සටහන් වෙමින් වෙරළෙන් ඔබ්බෙහි ඇති වූ භූ කම්පනය සුලවේසි දූපතේ පාලු නගරය දැඩි බලපෑමකට ලක්වූ අතර, පසුව මීටර් 2ක් පමණ උදම් රළ සමග සුනාමි තත්ත්වයක්ද බලපෑවේය.

මේ සියලු ව්‍යසනයන් සමග නගරයේ මුස්ලිම් පල්ලි ඇතුළු ගොඩනැගිලි රැසක් කඩා වැටුණු අතර, සුනාමි තත්ත්වය සමග මුහුද ගොඩගැලීමෙන් ව්‍යසනය දෙගුණ තෙගුණ විය.

ඒ අනුව, මේ වනවිට පසුගිය සිකුරාදා ඇති වූ භූ කම්පනයෙන් සිදුවූ මරණ 384දක්වා ඉහළ ගොස් ඇති අතර, තවත් 500ක් පමණ දෙනා තුවාල ලබා තිබේ. එමෙන්ම, අතුරුදන් විශාල පිරිසක් සිටින බැවින් මරණ සංඛ්‍යාව වැඩිවිය හැකි බව බලධාරීහු පවසති.

මියගිය අයගේ සිරුරු නගරයේ වීදිවල තැන තැන තබා ඇති අතර, තුවාලකරුවන් රෝහල්වල ප්‍රතිකාර ලබමින් සිටින අතරතුර මේ වනවිට ප්‍රබල පසු කම්පන හේතුවෙන් සෙසු ජනතාවද දැඩි භීතියකට පත්ව සිටීයි.

බලධාරීන් සඳහන් කරන්නේ මෙම දරුණු ඛේදවාචකයෙන් සිදුවූ හානිය මෙතෙක් ගණනය කළ නොහැකි මට්ටමක පවතින බවයි.

ඉන්දුනීසියාව භූ කම්පන කලාපයක පිහිටි රාජ්‍යයක් වන අතර, 2004 වසරේ ආසියානු කලාපයටම බලපෑම් කරමින් සුමාත්‍රා හි ඇති වූ ප්‍රභල භූ කම්පනයෙන් හා සුනාමි තත්ත්වයෙන් ඉන්දුනීසියාවේ පමණක් 120,000කට වැඩි පිරිසක් ජීවිතක්ෂයට පත්වූහ.