අම්බලන්තොට රිය අනතුරකින් හයකට තුවාල

තිස්ස - මාතර ප්‍රධාන මාර්ගයේ අම්බලන්තොට, එක්කස්ස ප්‍රදේශයේදී ඊයේ (27දා) රාත්‍රියේ මෝටර් රථයක් හා ත්‍රිරෝද රථයක් එකිනෙක ගැටී පුද්ගලයන් 06 දෙනෙකු තුවාල ලබා ඇතැයි අම්බලන්තොට පොලීසිය පවසයි.

නෝනාගම දෙස සිට අම්බලන්තොට දෙසට ධාවනය වූ මෝටර් රථයක් එහි රියැදුරුට පාලනය කරගත නොහැකිව අසල තිබූ කුඩා පාලමක ගැටී අනතුරුව අම්බලන්තොට සිට නෝනාගම දෙසට ධාවනය වූ ත්‍රිරෝද රථයේ ගැටී තිබේ.

ත්‍රිරෝද රථයේ ගමන් ගත් කුඩා දරුවෙකු ඇතුළු සිවුදෙනෙකු හා මෝටර් රථයේ ගමන්ගත් පුද්ගලයන් දෙදෙනෙකු අනතුරින් තුවාල ලබා ඇත.

තුවාලකරුවන් අම්බලන්තොට රෝහලට ඇතුළත් කිරීමෙන් පසු හම්බන්තොට මහ රෝහලට මාරුකර යවා තිබේ .

සිද්ධිය සම්බන්ධයෙන් අම්බලන්තොට පොලීසිය වැඩිදුර පරීක්ෂණ පවත්වයි.

(හම්බන්තොට - රාහුල් සමන්ත හෙට්ටිආරච්චි)