අප්‍රිකානු සංගමය ඉන්දීය සීරම් වෙතින් තව ඇස්ට්‍රාසෙනෙකා මිලදී ගැනීමේ සැලසුම් අත්හරී

ඇස්ට්‍රාසෙනෙකා කොවිඩ් -19 එන්නතෙහි අතිරේක මාත්‍රාවන් සෘජුවම ඉන්දියාවේ සීරම් ආයතනයෙන් මිලදී ගැනීමේ සැලසුම් අත්හරින බව අප්‍රිකානු සංගමය නිවේදනය කරයි.

ඒ වෙනුවට ජොන්සන් සහ ජොන්සන් වෙතින් තවත් එන්නත් ලබා ගැනීම කෙරෙහි අවධානය යොමු කරනු ඇති බවද ඔවුන් පවසයි.

මෙම තීරණය ඇස්ට්‍රාසෙනෙකා එන්නත පිළිබඳ මෑත කාලීන ආරක්‍ෂාව හා සම්බන්ධ නොවන නමුත් ඔවුන් දුගී රටවලට එන්නත් සපයන කොවැක්ස් වැඩසටහන සමග ඉතා සමීපව කටයුතු කරන බවද අප්‍රිකා රෝග පාලන හා වැළැක්වීමේ මධ්‍යස්ථානයෙහි අධ්‍යක්ෂ ජෝන් නෙන්කැන්සොං පැවසීය.

පසුගිය සතියේ අප්‍රිකානු එන්නත ලබාගැනීමේ සන්ධානය අප්‍රිකානු සංගමයේ සාමාජික රටවල් 55 වෙනුවෙන් එන්නත් මාත්‍රා මිලියන 220ක් සඳහා ජොන්සන් සහ ජොන්සන් සමග ගිවිසුමක් අත්සන් කර තිබේ. ඒ අනුව මෙම වසරේ තෙවැනි කාර්තුව ආරම්භයේදී මෙම එන්නත් ලබා ගත හැකි වනු ඇතැයි තමන් බලාපොරොත්තු වන බව නෙන්කැන්සොං පැවසීය.

"ජොන්සන් සහ ජොන්සන් එන්නත තනි මාත්‍රාවක් බැවින්, එයින් අදහස් වන්නේ එම එන්නත් රටවල් විසින් ලබා ගන්නේ නම්, මහාද්වීපයේ මිලියන 400ක ජනතාවකට ප්‍රතිශක්තිකරණය ලබා දීමට අපට හැකියාව ඇති බවයි." ඔහු වැඩිදුරටත් පැවසීය.

කෙසේ වෙතත් ඇස්ට්‍රාසෙනෙකා එන්නත සහ ඉතා දුර්ලභ රුධිර කැටි ගැසීම් අතර සම්බන්ධයක් ඇති බව යුරෝපා සංගම් ඖෂධ නියාමක සොයා ගැනීමෙන් දිනකට පසුව අප්‍රිකානු සංගමය මෙම තීරණය ගෙන තිබේ.