අධිවේගි මාර්ගයේ රිය අනතුරකින් ලොරිරථ රියදුරෙකු ජිවිතක්ෂයට

මාළු පටවාගෙන  අධිවේගී මාර්ගය ඔස්සේ  පැමිණෙමින් තිබූ ලොරියක් කිලෝ මීටර් 9.5 බණ්ඩාරගම බද්දේ ගොඩ ප්‍රදේශයේදී  නවතා තිබූ  ටිපර් රථයක  ගැටීමෙන්  ලොරි රියදුරු මියගිය බව දක්ෂිණ අධිවේගී රථවාහන පොලිසිය කියයි.

අනතුරින් මියගොස් ඇත්තේ  දෙවිනුවර විසුම්පාය නිවසේ පදිංචිව සිටි නිහාල්  රත්නායක 55, යන අයයි.

මාළු රැගෙන ගාල්ල දෙස සිට ලොරි රථය  අධිවේගී මාර්ගය ඔස්සේ කොළඹ දෙසට පැමිණෙමින් තිබියදී බණ්ඩාරගම බද්දේ ගොඩ පාලම ආසන්නයේ මාර්ගයේ මාර්ග සංවර්ධන අධිකාරියේ සේවකයන්  නඩත්තු කටයුතු සිදු කරමින් සිට ඇතැයි පොලිසිය කියයි.

කාපට් ඇතිරීම සඳහා යොදාගන්නා වාහන මෙන්ම කාපට් රැගෙන  ආ ටිපර් රථය ද දකුණු මංතීරුවේ නවතා ඒ සඳහා අවශ්‍ය සියලුම ආරක්ෂිත ක්‍රමවේදයන් අනුගමනය කරමින් කොළඹ දිසාවට ගමන් ගන්නා වාහන වලට වමේ මං  තීරුව වෙන්කර  ඔවුන් නඩත්තු කටයුතු කරමින් සිට ඇතැයි පොලිසිය කියයි.

කොළඹ දෙසට ධාවනය වූ මාලු ලොරිය  සියයට 75 ක පමණ ප්‍රමාණයක්  එම ස්ථානය පසුකරගෙන ගොස් අවසානයේ දකුණු පස නවතා තිබු ටිපර් රථයේ පිටුපස ගැටී මෙම අනතුර වී ඇතැයි පොලිස් නිලධාරියෙක් පැවැසීය.

අනතුර සිදුවූ වහාම එම ස්ථානයට ළඟාවූ පොලිස් විශේෂ කාර්ය බලකායේ නිලධාරීන් බරපතළ තුවාල ලබා ලොරිය තුළ සිරවී සිටි රියැදුරු පිටතට ගෙන හෝමාගම මූලික රෝහලට රැගෙන යාමෙන් අනතුරුව මිය ගොස් ඇතැයි පොලිසිය කියයි.

මියගියේ රියදුරුගේ පශ්චාත් මරණ පරීක්ෂණය හෝමාගම මූලික රෝහලේදී සිදු රෝහලේ දී සිදුකිරීමට නියමිතය.

අනතුරෙන් මාළු ලොරිය ඉදිරිපසට බරපතළ අලාභ සිදු වී ඇතැයි පොලිසිය කියයි.

බිමල් ජයසිංහ