ISIS ඉස්ලාමීය අන්තවාදීන් තවත් ඇමෙරිකානුවෙකුගේ ගෙල සිඳී?

ISIS ඉස්ලාමීය අන්තවාදීන්ගේ ග්‍රහණයේ සිටි තවත් ඇමෙරිකානු ජාතික ප්‍රාණ ඇපකරුවෙකු වූ අබ්දුල් රහ්මාන් කාසිග් ගෙල සිඳ අමානුෂික අයුරින් ඝාතනය කර ඇති බව විදෙස් පුවත් සේවා වාර්තා වෙයි.

ඔවුන් විසින් නිකුත් කර ඇති නවතම වීඩියෝවක මෙම ඇමෙරිකානු සහන සේවකයා ඝාතනය කරන ආකාරය දැක්වෙයි.

මෙම වීඩියෝව සැබෑ වීඩියෝවක්ද යන්න පිළිබඳව ඇමෙරිකානු බලධාරීන් තවදුරටත් පරීක්ෂණ පවත්වන අතර, එම දර්ශනය සහිත වීඩියෝව තුළම සිරියානු සෙබලු රැසකගේ හිස ගසා දමන දර්ශනද ඇතුළත්ව පවතී.

පසුගිය වසරේදී ඉස්ලාමීය අන්තවාදීන් අතට පත්වූ කාසිග්, පීටර් යන නමින්ද හඳුන්වයි.

ඇමෙරිකාවේ ඉන්දියානා ප්‍රාන්තයේ ජීවත් වන කාසිග්ගේ පවුලේ ඥාතීන් තම පුතාගේ මරණය පිළිබඳ දැඩි කණස්සල්ලට පත්ව ඇති අතර, වීඩියෝවේ නිරවද්‍යතාව පිළිබඳ ඔවුන්ද විමසිල්ලෙන් සිටින බව කියැවෙයි.