සෞදි ඇමෙරිකානු තානාපති කාර්යාලයට ජිහාඩ් ප්‍රහාරයක්

සෞදි අරාබියේ, ජෙඩාහ් නුවර ඇමෙරිකානු තානාපති කාර්යාලය වෙත ජිහාඩ් අන්තවාදියෙකු විසින් මරාගෙන මැරෙන බෝම්බ ප්‍රහාරයක් එල්ල කර තිබේ.

අද (04දා) අලුයම සෞදි අරාබියේ දෙවැනි විශාලතම නගරයේ පිහිටි ඇමෙරිකානු තානාපති කාර්යාලය වෙත මෝටර් රථයකින් පැමිණ ඇති ප්‍රහාරකයා, එහි ආරක්ෂක නිලධාරීන් විසින් පරීක්ෂා කිරීමට උත්සාහ කිරීමේදී සිය මරාගෙන මැරෙන බෝම්බය පුපුරුවාගෙන තිබේ.

මෙම පිපිරීමෙන් ප්‍රහාරකයා ජීවිතක්ෂයට පත්ව ඇති අතර, ආරක්ෂක නිලධාරීන් දෙදෙනා බරපතල තුවාල ලබා ඇති බව වාර්තා වෙයි.

මෙම පිපිරීමෙන් පැය කිහිපයකට පසුව එම ප්‍රදේශයේ තවත් පිපිරීම් තුනක් සිදුව ඇති අතර, මෙය එම ස්ථානයේ වූ බෝම්බ ආරක්ෂක අංශ විසින් නිශ්ක්‍රීය කිරීමක් ලෙසද වාර්තා වෙයි.

මෙම ප්‍රහාරය සම්බන්ධයෙන් අදහස් දක්වන ඇමෙරිකානු රාජ්‍ය දෙපාර්තමේන්තුව, ඒ පිළිබඳ වැඩිදුර තොරතුරු ලබාගැනීමට සෞදි රජය සමග සාකච්ඡා කරන බවද පවසා තිබේ. කෙසේ වෙතත්, තානාපති කාර්යාලයේ කිසිදු නිලධාරියෙකුට හානියක් සිදුව නොමැති බවද ඔවුන් කියයි.

මේ අතර, රාමසාන් සමය තුළ ඉස්ලාම් අන්තවාදීන්ගේ ප්‍රහාර දැඩි කරන බවට වූ අනතුරු ඇඟවීම් මෙන්ම, ඇමෙරිකානු බුද්ධි අංශ වෙත ලැබුණු තොරතුරු මත සෞදියේ වෙසෙන ඇමෙරිකානු ජනතාවට වඩාත් සුපරික්ෂාකාරීව රට තුළ ගමන් කරන ලෙසත්, අනවශ්‍ය ගමන්බිමන්වලින් තොරව රැඳී සිටින ලෙසත් මීට පෙරද අනතුරු ඇඟවීමක් කර තිබුණි.

මෙම ප්‍රහාරයේ වගකීම කිසිවෙකු විසින්වත් භාරගෙන නොතිබුණත්, 2014 මැද භාගයේ සිට ෂිට් මුස්ලිම්වරුන් ඉලක්ක කරමින් අයි.එස්. ඉස්ලාම් රාජ්‍ය ත්‍රස්තයන් සෞදි අරාබිය තුළ ප්‍රහාර කිහිපයක්ම එල්ල කර තිබුණි.