සමසමාජ සහාය මහින්දට

ඉදිරි ජනාධිපතිවරණයේදී මහින්ද රාජපක්ෂ මහතාට සහාය පළ කිරීමට පෙරේදා (26දා) රැස්වූ ලංකා සමසමාජ පක්ෂයේ මධ්‍යම කාරක සභාව රැස්වීමේදී තීරණය කර තිබේ.ජාතික හා ජාත්‍යන්තර වශයෙන් ඉතා වැදගත් දේශපාලන යෝජනා කිහිපයක් පදනම් කරගනිමින් මෙම තීරණයට එළඹි බව එම පක්ෂයේ නියෝජ්‍ය ලේකම් අනිල් ද සොයිසා මහතා පැවසීය.

අධිරාජ්‍යවාදයට එරෙහිව සෑමවිටම  කටයුතු කරන ලංකා සමසමාජ පක්ෂයට අධිරාජ්‍ය ගැත්තෙකු සේ කටයුතු කරන එක්සත් ජාතික පක්ෂයේ හෝ එහි ප්‍රතිපත්තිවලට එකඟ අයෙකුට සහාය ලබාදිය නොහැකි බවට මධ්‍යම කාරක සභාවේදී වැඩිදෙනෙකුගේ අදහස වූ බව නියෝජ්‍ය ලේකම්වරයා ප්‍රකාශ කළේය.

මෙවර මධ්‍යම කාරක සභා රැස්වීමට ඉදිරිපත්ව තිබූ දේශපාලන යෝජනා 03ක් සාකච්ඡා කිරීමෙන් අනතුරුව ඉදිරි ජනාධිපතිවරණයේදී මහින්ද රාජපක්ෂ මහතාට සහාය පළ කළයුතු බවට යෝජනාවක් ඉදිරිපත් වූ බව අනිල් ද සොයිසා මහතා සඳහන් කළේය. එම යෝජනාවට පක්ෂව මහාචාර්ය තිස්ස විතාරණ, වයි.ජී. පත්මසිරි, බද්දේගම සමිත හිමි, සමන්ප්‍රිය හේරත්, අනිල් ද සොයිසා ඇතුළු මධ්‍යම කාරක සභිකයන් 23 ක් ඡන්දය ප්‍රකාශ කර තිබේ.