වැට් සියයට 15 වෙනසක් නෑ

එකතු කළ අගය මත බද්ද හෙවත් වැට් බද්ද 15% දක්වා වැඩි කිරීම එලෙසම තබා ගනිමින් වැට් බදු සංශෝධන පනත් කෙටුම්පතට ඊයේ (13දා) කැබිනට් අනුමැතිය හිමි වී තිබේ.මෙම නව සංශෝධිත පනත් කෙටුම්පත මගින් රු.මිලියන 12ක වාර්ෂික පිරිවැටුපක් හිමි තොග සහ සිල්ලර වෙළඳ ආයතන සඳහා යෝජනා වූ වැට් බද්ද අය කිරීම රු.මිලියන 50 ක වාර්ෂික පිරිවැටුම දක්වා වැඩි කරමට ද තීරණය වී තිබේ. ඒ අනුව සුළු ව්‍යාපාරිකයාට වැට් සහනයක් හිමිවනු ඇත.

එමෙන්ම, රෝහල් ගාස්තු, වෛද්‍ය ගාස්තු, පරීක්ෂණ ගාස්තු හා ඖෂධ නිකුත් කිරීම වැනි සෞඛ්‍ය සේවාවන් සඳහා යෝජනා වී අය කෙරුණු වැට් බද්ද ඇතුළත් නොකර පෙර පරිදි පවත්වාගෙන යෑමට ද මෙම වැට් බදු සංශෝධන පනත් කෙටුම්පතෙන් තීරණය කර ඇති බවද කියැවෙයි. කෙසේ වෙතත්, 11% ක්ව පැවති වැට් බද්ද 15% දක්වා වැඩි කිරීම එලෙසම තබා ගැනීමටද මෙම නව සංශෝධන පටන් කෙටුම්පතෙන් සිදුවනු ඇත.

මීට පෙර මෙම පනත පාර්ලිමේන්තුවට රැගෙන ආ අවස්ථාවේදී ශ්‍රේෂ්ඨාධිකරණය විසින් එය බල ශුන්‍ය බවට තීන්දු කළේය. එම තීන්දුව කතානායකවරයා විසින් පාර්ලිමේන්තුවට දන්වන ලදී. ආණ්ඩුක්‍රම ව්‍යවස්ථාවේ 152 වැනි වගන්තියට අනුව බදු පනත් කෙටුම්පතක් පාර්ලිමේන්තුවට ඉදිරිපත් කළ හැකිවන්නේ එය කැබිනට් මණ්ඩලය විසින් අනුමත කර ඇති විට පමණි. 

එසේ අනුමැතිය ලැබී ඇති බවට පනත් කටුම්පත පාර්ලිමේන්තුවට ඉදිරිපත් කරන අවස්ථාවේදී අදාළ අමාත්‍යවරයා විසින් පාර්ලිමේන්තුවට දැනුම් දිය යුතු බව ස්ථාවර නියෝග 133 හි දක්වා තිබේ. කෙසේ වෙතත්, පසුගිය වර පනත බල ශූන්‍ය වූයේ මෙම ක්‍රමවේදය අනුගමනය නොකළ නිසාය. ඒ අනුව, එම වරද නිවැරදි කරමින් මූලිකව කැබිනට් මණ්ඩලයේ අනුමැතිය සහිතව වැට් බදු සංශෝධන පනත් කෙටුම්පත පාර්ලිමේන්තුවට ඉදිරිපත් කිරීමට රජය තීරණය කර ඇත.