රු ට්‍රිලියන 2.28ක් රටින් පිටකරලා

2004 වසරේ සිට 2013 වසර දක්වා දස වසරක කාලයක් තුළදී රුපියල් ට්‍රිලියන 2.88 ක් එනම් ඇමෙරිකානු ඩොලර් බිලියන 19.96 ක මුදලක් වංචා සහගත ලෙස මෙරටින් පිටකර ඇතැයි ඒ පිළිබඳව නිරීක්ෂණය කළ ග්ලෝබල් ෆයිනෑන්ෂල් ඉන්ටග්‍රිටි නම් ඇමෙරිකානු ආයතනයක් අනාවරණය කරයි. 
ඒ අනුව මෙරට දේශපාලනඥයන්, ව්‍යාපාරිකයන්, අපරාධකරුවන් සහ බදු වංචාකරන්නන් ඇතුළුව බොහෝ පිරිසක් මෙම දැවැන්ත වංචාව වෙත සම්බන්ධවී ඇතැයිද මෙම ආයතනය සඳහන් කර සිටියි.
එහිදී මූලිකවම පහසුවෙන් හඳුනාගත නොහැකි මුදල් ගනුදෙනු හරහා මෙම මූල්‍ය වංචාව සිදුකර ඇති බවත් එම වාර්තාවේ සඳහන්ව තිබේ. මේ අතර ඇති ඇතැම් නීතිවිරෝධී මුදල් ගනුදෙනු පිළිබඳව දත්ත බැංකු සහ නීතිවිරෝධී මුදල් හුවමාරුකරුවන් මගින් සඳහන් නොකර සිටීමත් මෙහිදී කැපී පෙනෙන බව මෙම ඇමෙරිකානු අධ්‍යයනය හරහා හෙළිදරව් වී තිබේ.
මෙහිදී වැඩිම මුදල් වංචාවක් සිදුව ඇති වසර ලෙස 2011 හඳුනාගෙන ඇති අතර, එම වසරේදී ඇමෙරිකානු ඩොලර් බිලියන 4.6 ක් රටින්  පිටකර ඇතැයිද  සඳහන් වෙයි. එසේම එම අගය 2009 වසරට සාපේක්ෂව දෙගුණයක් වෙයි. මෙම වාර්තාවට අනුව 2010 දී මෙරටින් පිට කළ මුදල් ප්‍රමාණය ඇමෙරිකානු ඩොලර් බිලියන 2.63 කි. විශේෂයෙන්ම 2009 වසර යනු මෙරට තුළ ත්‍රස්තවාදී යුද්ධය අවසන් කිරීමත්, ලෝක ආර්ථික අර්බුදය පැවති වසර වීමත් කැපී පෙනෙන බවත් එම ආයතනය වැඩිදුරටත් සඳහන් කරයි.
ඇමෙරිකාවේ වොෂිංටන් නුවර පිහිටා ඇති මෙම ග්ලෝබල් ෆයිනෑන්ෂල් ඉන්ටග්‍රිටි ආයතනය නීතිවිරෝධී මුදල් සම්බන්ධයෙන් විශ්ලේෂණය කිරීම හඳුනාගැනීම සහ ඒ පිළිබඳව උපදෙස් ලබාදීම යනාදිය සිදුකරන ආයතනයක් ලෙස ක්‍රියාත්මක වෙයි. 

විමුක්ති කරුණාරත්න