ලුණුගල තිබුණේ මැණික් ගල් විශේෂ

(UPDATE) ලුණුගල ප‍්‍රදේශයට අද (18දා)දහවල් 11.30 ට පමණ මහ වැස්සත් සමග මැණික් ගල් වැටී ඇතැයි පැතිර ගිය රාවයක් නිසා ජනතාව දැඩි සේ නොසන්සුන් වූහ.

ලුණුගල පොලීසිය අසල සිට කිලෝමීටර් 5 ක් පමණ ඈතින් පිහිටි හොප්ටන් වත්තේ කාංචනා මාවත දක්වා මගදිගට රැස් වූප්‍රදේශවාසීන් මාර්ගය දිගේ වැටී තිබුණු ඉතා කුඩා මැණික් ගල් විශේෂයක් අහුලමින් සිටියහ. නිල්,රතු,කහ සහකොළ පැහැයෙන් යුත් මෙම ගල් වර්ගය කිරිංචි,ගෝමේද,හා පඩියන් යන නම්වලින් හඳුන්වන බව මැණික් ව්‍යාපාරිකයෝ කියති.

සමහරු පැවසුවේ ජනාධිපතිවරයාගේ උපන් දිනය නිසා කිසිවෙකු විසින් මෙම ගල් පාර පුරා විසුරුවා ඇති බවයි. කෙසේ නමුත් අප කළ විමර්ශනයකදී අනාවරණය වූයේ වාහනයකින් රැගෙන යමින් සිටියදී මෙම ගල්  පාර පුරා වැටී ඇති බවයි. 

ලුණුගල ප්‍රදේශයට අද (18දා) උදේ පැවති අධික වර්ෂාවත් සමග මැණික් කැට වැටුණු බව පවසමින් පාෂාණ වර්ගයක් අහුලමින් සිටි විශාල පිරිසක් ඉවත් කිරීමට කටයුතු කළ බව පොලීසිය පවසයි.

ලුණුගල නගරයේ සිට වේල්ලවෙල ප්‍රදේශය දක්වා යන මාර්ගයේ කිලෝමීටර් 4 ක පමණ දුරක මෙසේ ප්‍රදේශවාසීන් ගල් අහුලමින් සිට ඇත.

එම මාර්ගයේ ගමන්ගත් ලොරි රථයකින් බිමට වැටී ඇති ගෝමේද හා රබස් නමැති පාෂාණ වර්ගවලට මැණික් යැයි සිතා මෙසේ අහුලා ඇති බව පොලීසිය පවසයි.

මේ හේතුවෙන් ගමනාගමනයට බාධාවීම ඇති නිසා ඔවුන් එම ස්ථානවලින් ඉවත් කිරීමට පොලීසිය පියවර ගෙන ඇත.

ලුණුගල ප්‍රසන්න පත්මසිරි/ පාලිත ආරියවංශ