මහින්දව බලෙන් හරි පක්ෂයට ගන්නවා - බැසිල්

ශ්‍රී ලංකා පොදුජන පෙරමුණ වටා ලක්ෂ 78ක ජනතාවක් පෙළගැසී සිටින බව එම පක්ෂයේ සාමාජික හිටපු අමාත්‍ය බැසිල් රාජපක්ෂ මහතා අද (17දා) පැවසීය.ඒ අනුව ශ්‍රී ලංකාවේ ප්‍රධාන දේශපාලන පක්ෂ දෙකෙන් එකක් ලෙසට නව පක්ෂය හැඳින්විය හැකි බවත්, හිටපු ජනාධිපති මහින්ද රාජපක්ෂ මහතා බලෙන් හෝ නව පක්ෂයට සම්බන්ධ කරගන්නා බවත් හෙතෙම පවසා සිටියේය.

ඒකාබද්ධ විපක්ෂය සමග සිටින පාර්ලිමේන්තු මන්ත්‍රීවරුන් හදවතින්ම මෙම පක්ෂය සමග සිටින බවත්,මෙම පක්ෂයට සම්බන්ධවීමේදී ඔවුන්ට නීතිමය බාධා එල්ලවී තිබෙන බවත් හිටපු  ඇමතිවරයා සඳහන් කළේය.

ශ්‍රී ලංකා පොදුජන පෙරමුණ විසින් පැවැත්වූ ප්‍රථම ප්‍රවෘත්ති සාකච්ඡාවට එක්වෙමින් බැසිල් රාජපක්ෂ මහතා මෙම අදහස් පළකළේය.බත්තරමුල්ල, නෙළුම් මාවතේ පිහිටි ඒකාබද්ධ විපක්ෂයේ ප්‍රධාන මෙහෙයුම් කාර්යාලයේදී මෙම මාධ්‍ය හමුව පැවැත්විණි.

මෙහිදී අදහස් දැක්වූ ශ්‍රී ලංකා පොදුජන පෙරමු‍ණේ සභාපති මහාචාර්ය ජී.එල්.පීරිස් මහතා සඳහන් කළේ පාර්ලිමේන්තු මන්ත්‍රීවරුන් සඳහා පක්ෂයේ සාමාජික කාඩ්පත් 100ක්ද,පළාත් සභා මන්ත්‍රීවරුන් සඳහා පක්ෂයේ සාමාජික කාඩ්පත් 200ක් වෙන්කර තිබෙන බවයි.

ඡායාරූප ශමීර රාජපක්ෂ