'මහින්ද දිණුවනම් ඇමෙරිකාවේ වෙන දේ ලංකාවට වෙනවා'

පසුගිය ජනාධිපතිවරණය මහින්ද රාජපක්ෂ මහතා ජයග්‍රහණය කළේ නම් අද ඇමෙරිකාවේ වන දේ එදා ලංකාවේ වෙන්න ඉඩ තිබුණේ යැයි පිවිතුරු හෙළ උරුමයේ පාර්ලිමේන්තු මන්ත්‍රී උදය ගම්මන්පිල මහතා පැවසීය.

‍හෙතෙම මේ බව පැවසුවේ, එම පක්ෂයේ ප්‍රධාන කාර්යාලයේ අද (14දා) පැවැති මාධ්‍ය හමුවකදීය.

එහිදී වැඩිදුරටත් අදහස් දැක්වූ මන්ත්‍රීවරයා,

"අපිට තොරතුරු ලැබුණා පාක්ෂිකයන් සමග ඇවිත් අරලියගහ මන්දිරය වටලන්න එදා විපක්ෂයේ සිටිය අය සුදානම්ව සිටියා කියලා අපිට පැය 48කට කලින් තොරතුරු ලැබිලා තිබුණා. අපි මේ පිළිබඳව සාකච්ඡා කරලත් තිබුණේ. නමුත් අපි මැතිවරණ ප්‍රතිඵල එන්නත් පැය 12කට කලින් වත්මන් අගමැතිතුමා සමග බලය හුවමාරු කර ගැනීමේ සාකච්ඡාවක් පැවැත්වුණු නිසා මේ අයට පරාජය පිළිනොගැනීමේ අරගලය කරන්න වුණේ නෑ.

අපිට මතකයි  2010ත් එහෙමයි. පරාජය පිළිගන්නේ නැතුව කම්පියුටර් ජිල්මාට් කිව්වා. නමුත් උසාවි ගිහිල්ලා නඩුව දාන කොට කම්පියුටර් ජිල්මාට් කෑල්ල හැලිලා. ඒකෙන් පෙන්නේ අද ක්ලින්ටන් නෝනාගේ පාක්ෂිකයන් සම වන්නේ අද බලයේ ඉන්න අයටයි. ඔවුන් ජනාධිපතිවරණය පැරදුණා නම් ලංකාවේ ඇතිවෙන්න තිබුණෙත් මේ හා සමාන තත්ත්වයක්.

අද ලංකාවේ ආණ්ඩුවේ ඉන්න අයටත් ඇමෙරිකාවේ විපක්ෂයේ ඉන්න අයටත් බුදුරජාණන් වහන්සේ ඉගැන්වූ තාදී ගුණය වඩමින් ජයග්‍රහණයත් පරාජයත් එකසේ භුක්ති විඳින්න කියන ඉල්ලීම කරනවා." යනුවෙන් පවසා සිටියේය.