මහ බැංකු අධිපතිගේ ඉරණම කෝප් කමිටුවෙන්

මහ බැංකු අධිපති අර්ජුන මහේන්ද්‍රන් මහතා තවදුරටත් එම තනතුරේ තබා ගන්නවාද? නැද්ද? යන්න පිළිබඳව අවසන් තීරණය පොදු ව්‍යාපාර පිළිබඳ කාරක සභාව (කෝප් කමිටුව) ඔහු පිළිබඳව පවත්වන විමර්ශනයේ ප්‍රතිඵලය මත තීරණය කිරීමට රජයේ අවධානය යොමුව ඇතැයි වාර්තා වෙයි.

මතභේදාත්මක භාණ්ඩාගාර බැඳුම්කර අලෙවි කිරීමේ සිද්ධිය පිළිබඳව මහ බැංකු අධිපතිවරයාට එරෙහිව මේ වන විට පාර්ලිමේන්තුවේ කෝප් කමිටුව  විමර්ශනයක් පවත්වන අතර, එහි ප්‍රථිඵලය ඉදිරියේදී රජයට ලබාදීමට නියමිතය.

පසුගිය වසරේදී වසරක කාලයක් සඳහා මහ බැංකු අධිපතිවරයා පත්කළ අතර, ඔහුගේ ධුර කාලය මේ මාසයෙන් අවසන් වීමට නියමිත අතර, ඔහු නැවත පත්කිරීම පිළිබඳව මේ වන විට ආණ්ඩුව මත දෙකක සිටියි. 

ආණ්ඩුවේ එක්සත් ජාතික පක්ෂ මන්ත්‍රීවරුන්ගේ මෙන්ම ඇමතිවරුන්ගේ අදහස වී ඇත්තේ මහ බැංකු අධිපතිවරයා නැවත පත්කරන ලෙසයි. කෙසේවෙතත් ආණ්ඩුව නියෝජනය කරන ශ්‍රී ලංකා නිදහස් පක්ෂ ඇමතිවරුන්ගේ අදහස වී ඇත්තේ මහ බැංකු අධිපතිවරයා නැවත පත්නොකරන ලෙසයි. 

රාජිත සේනාරත්න, එස්.බී.දිසානායක අමාත්‍යවරයා ප්‍රමුඛ අමාත්‍යවරු කීපදෙනෙකුම ජනාධිපතිවරයාගෙන් ඉල්ලා ඇත්තේ මහ බැංකු අධිපතිවරයා නැවත පත්නොකර ලෙසයි. එසේම පාර්ලිමේන්තුවෙන් ඒකාබද්ධ විපක්ෂ මන්ත්‍රීවරු මෙන්ම ජනතා විමුක්ති පෙරමුණේ මන්ත්‍රීවරුන්ද මහ බැංකු අධිපතිවරයා නැවත පත්කිරීමට සිය විරෝධය ප්‍රකාශ කර තිබේ.

ඒ අනුව මෙම සිද්ධිය සම්බන්ධයෙන් අගමැතිවරයා හා ජනපතිවරයා දීර්ඝ වශයෙන් සාකච්ඡා කර මහ බැංකු අධිපතිවරයා නැවත පත්කිරීම පිළිබඳව අවසන් තීරණය කෝප් කමිටු වාර්තාවෙන් පසුව ගැනීමටත්, ඒ දක්වා නැවත වරක් ඔහුගේ සේවා කාලය දීර්ඝ නොකිරීමටත් තීරණය කර තිබේ.

එසේම ඒ වන තෙක් නව මහ බැංකු අධිපතිවරයෙක් පත්නොකිරීමටත්, දැනට මහ බැංකුවේ සිටින ඉහළ නිළධාරීන් හා එහි කටයුතු පවත්වාගෙන යාමටත් රජයේ අවධානය යොමුව ඇතැයිද වැඩිදුරටත් තොරතුරු වාර්තා වෙයි. පාර්ලිමේන්තුවේ කෝප් කමිටුවේ සභාපතීත්වය දරන්නේ ජනතා විමුක්ති පෙරමුණේ පාර්ලිමේන්තු මන්ත්‍රී සුනිල් හඳුන්නෙත්ති මහතායි.