මධ්‍යම අධිවේගයේ 2 අදියරේ ඉදිකිරීම් ඇරැඹේ

මධ්‍යම අධිවේගී මාර්ගයේ මීරිගම - කුරුණෑගල 2 වැනි කොටසේ ඉදිකිරීම් වසර දෙක හමාරකින් අවසන් කරන බව උසස් අධ්‍යාපන හා මහා මාර්ග අමාත්‍ය ලක්ෂ්මන් කිරිඇල්ල මහතා පැවැසීය.‍අධිවේගී මාර්ගයේ මීරිගම සිට කුරුණෑගල දක්වා දෙවැනි කොටසේ ඉදිකිරීම් කටයුතු අද (06දා) ගිරිඋල්ල බෝයවලාන මංසන්ධියේදී ආරම්භ කරමින් අමාත්‍යවරයා මෙම අදහස් දැක්වීය.

මීරිගම සිට කුරුණෑගල දක්වා අධිවේගී මාර්ග දෙවැනි කොටසේ  දුර කි.මී 39.7 කි. මෙයට අඹේපුස්ස දක්වා දිවෙන කි.මී 9.7 ක දිග පිවිසුම් මාර්ගයද ඇතුළත් වේ.  මධ්‍යම අධිවේගී මාර්ග ව්‍යාපෘතියේ මීරිගම සිට කුරුණෑගල දක්වා දෙවැනි කොටස මංතීරු 4කින් ඉදිවේ. පැයට කි.මී.100ක වේගයෙන් වාහන ධාවනය කළ හැකි පරිදි නිම කෙරෙන මෙහි, අන්තර් හුවමාරු මධ්‍යස්ථාන 5ක් ඇතුළත්ය. මීරිගම උතුර, නාකුළුගමුව, පොතුහැර, දම්බොක්ක සහ කුරුණෑගල යන ස්ථානයන්හි එම අන්තර් හුවමාරු ස්ථාපිත කෙරේ.

මීරිගම සිට කුරුණෑගල දක්වා ස්ථාන 4ක පාලම් මතින් අධිවේගී මාර්ගය දිවෙන අතර පාලම්වලින් ආවරණය කෙරෙන දුර ප‍්‍රමාණය මීටර් 1095කි. මධ්‍යම අධිවේගී මාර්ගය ඉදිකිරීමට සැලසුම් කළේ, එක්සත් ජාතික පක්ෂය 2002 වසරේදී බවත් ඒ සඳහා කටයුතු කරමින් සිටියදී ආණ්ඩු වෙනස්වූ බවද අමාත්‍යවරයා මෙහිදී සඳහන් කළේය.

කොළඹ -රුවන්පුර- පැල්මඩුල්ල අධිවේගී මාර්ගය, කොළඹ-කුරුණෑගල-දඹුල්ල අධිවේගී මාර්ගය, රාජගිරිය, කැලණිය හා කිරුලපන සම්බන්ධ කෙරෙන කුලුනු මත දිවෙන අධිවේගී මාර්ග ඉදිරියේදී ආරම්භ කරන බවද අමාත්‍යවරයා පැවසීය.