බැඳුම්කර කොමිසමේ කාලය දීර්ඝ කිරීමක් ගැන දැනුම් දීමක් නෑ

භාණ්ඩාගාර බැඳුම්කර නිකුත් කිරීම පිළිබඳ සොයා බැලීම සඳහා පත්කොට ඇති ජනාධිපති පරීක්‍ෂණ කොමිසමේ කාලය දීර්ඝ කිරීම පිළිබඳ මෙතෙක් තමන්ට කිසිදු දැනුම්දීමක් සිදුකර නැතැයි භාණ්ඩාගාර බැඳුම්කර කොමිසමේ ලේකම් සුමතිපාල උඩුගමසූරිය මහතා ඊයේ (23දා)දැනුම් දුන්නේය.

කොමිසමේ කාලය මේ මස 27 වැනිදායින් අවසන් වීමට නියමිත අතර, කොමිසමේ කාලය තවදුරටත් දීර්ඝ කරන ලෙස ජනාධිපති මෛත්‍රීපාල සිරිසේන මහතාගෙන් ඉල්ලීමක් කර ඇතැයි බැඳුම්කර කොමිසමේ ලේකම්වරයා දැනුම් දුන්නේය.

තවත් සාක්‍ෂි කිහිපයක් ගැනීමට අවශ්‍ය වීම හා කොමිසමේ අවසන් වාර්තාව සකස් කිරීමට කාලයක් අවශ්‍ය වීම නිසා කොමිසමේ කාලය දීර්ඝ කරන ලෙස කොමිසම විසින් මෙලෙස ඉල්ලීමක් කර ඇත.

භාණ්ඩාගාර බැඳුම්කර නිකුත් කිරීම පිළිබඳ සොයා බැලීම සඳහා මෙම ජනාධිපති පරීක්‍ෂණ කොමිසම ජනාධිපති මෛත්‍රීපාල සිරිසේන මහතා විසින් පසුගිය පෙබරවාරි මාසයේදී පත්කරන ලදී. අනතුරුව අවස්ථා දෙකකදී මාස තුන බැගින් කොමිසමේ කාලය දීර්ඝ කළ අතර, එහි කාලය ලබන 27 වැනිදායින් අවසන් වීමට නියමිතය.

භාණ්ඩාගාර බැඳුම්කර නිකුත් කිරීමේ සිද්ධිය පිළිබඳ විමර්ශනය කිරීමේදී හා එයට අදාළව සාක්‍ෂි විමසීමේදී අමතර කරුණු හෙළිවීම මත මේ සම්බන්ධයෙන් තවදුරටත් විමර්ශනය කිරීමට සිදුවීම හේතුවෙන් කොමිසමේ කටයුතු අපේක්‍ෂා කළ දිනවලදී අවසන් කරගැනීමට නොහැකි වූ බව කොමිසමේදී අනාවරණය විය.

2015 පෙබරවාරි මස පළමුවැනිදාත්,2016 මාර්තු මස 31 වැනිදාත් අතර කාලයේ වත්මන් රජය යටතේ භාණ්ඩාගාර බැඳුම්කර නිකුත් කිරීම පිළිබඳ සොයා බැලීම සඳහා මෙම ජනාධිපති පරීක්‍ෂණ කොමිසම ජනාධිපති මෛත්‍රීපාල සිරිසේන මහතා මෙම කොමිසම පත්කරන ලදී.

මෙම ජනාධිපති පරීක්‍ෂණ කොමිසම ශ්‍රේෂ්ඨාධිකරණ විනිසුරුවරුන් වන කේ.ටී. චිත්‍රසිරි (සභාපති),ප්‍රසන්න ජයවර්ධන සහ හිටපු නියෝජ්‍ය විගණකාධිපති වේලුපිල්ලේ කන්දසාමි යන මහත්වරුන්ගෙන් සමන්විතය.