තැලසීමියා රෝගීන්ට සුබ ආරංචියක්

තැලසීමියා රෝගීන් සුව කිරීම සඳහා ඉතාලි රටේ විශේෂඥ වෛද්‍ය ලොරන්ස් ෆොක්නර් මහතා විසින් සොයාගෙන තිබෙන ඇට මිදුලු ස්ටෙම් සෛල බද්ධ පාරවිලයන ක්‍රමය ලංකාවට හඳුන්වාදීමට වෛද්‍ය ලොරන්ස් ෆොක්නර් මහතා කැමැත්ත පළ කළ බව ලංකා තැලසීමියා කවය සඳහන් කරයි.

ඒ සඳහා අවශ්‍ය ඉඩ පහසුකම් කොළඹ ළමා රෝහල තුළින් ලබාදීමට සෞඛ්‍ය බලධාරීන් කැමැත්ත පල කළ අතර, ඒ අනුව මේ මස 08 වැනිදා එම ඒකකය සකස් කිරීම ආරම්භ කරන බවද එම කවයේ අනුශාසක හා මාතෘ සහ කාන්තා වෛද්‍ය විශේෂඥ කාලිංග නානායක්කාර මහතා සඳහන් කළේය.

තැලසීමියාව රුධිර ජාන වලින් පැතිරෙන නිධන්ගත රෝගයක් බවත්, සෑම දින හතරකට වරක්ම මෙම රෝගයට ලක් වූ ළදරුවෙකු මෙරට තුළ ඉපදෙන බවද ඔහු පවසා සිටියේය.

මෙලෙස ඉපදෙන දරුවෙකුට වයස මාස 05  සිට ජීවිතාන්තය දක්වා අලුත් රුධිරය එකතු කළයුතු බවත්, මීට අමතරව ශරීරයට එකතුවන යකඩ ප්‍රමාණය ඉවත් කිරීමට දිනපතා ඖෂධ ගත යුතු බවද හෙතෙම සඳහන් කළේය.

ලංකාව තුළ ජීවත් වන තැලසීමියා රෝගීන්ගේ කටයුතු වෙනුවෙන් රජය වසරකට රුපියල් මිලියන 1700 ක් වියදම් කරන බවද අනුශාසකවරයා වැඩිදුරටත් පවසා සිටියේය.