තාර ලීටරයක මිල රුපියල් 6 කින් අඩු කෙරේ

අද (01දා) සිට වහා ම ක්‍රියාත්මක වන පරිදි තාර ලීටරයක මිල රු.6/- කින් අඩු කෙරෙන බව ලංකා ඛනිජ තෙල් නීතිගත සංස්ථාව පවසයි.

දැනට වෙළෙඳපොළේ පවතින තාර මිල සැලකිල්ලට ගනිමින් මෙම මිල අඩු කිරීම සිදුකළ බවත් ලෝක වෙළෙඳ පොළේ ඉන්ධන වර්ගයන්හි මිල ඉදිරියේදි තව තවත් පහළ ගියහොත් එහි වාසියද ජනතාවට ලබාගැනීමට හැකිවනු ඇති බවත් ලංකා ඛනිජ තෙල් නීතිගත සංස්ථාවේ සභාපති එස්. අමරසේකර මහතා පැවසූ බව රජයේ ප්‍රවෘත්ති දෙපාර්තමේන්තුව පවසයි.

මෙතෙක් රු.91/- ක් වූ බිටුමෙන් 80යි 100 වර්ගයේ තාර ලීටරයක් රු.85/- කටත්, රු.92/- කට අලෙවි කළ බිටුමෙන් 60යි 70 වර්ගයේ තාර ලීටරයක් රු.86/- කටත් අඩුකර තිබේ.

තාර ආනයනය කිරීමේදී අදාළ තත්ත්ව පරීක්ෂා සිදුකර සංස්ථාව මගින් සහතිකයක් ලබාදෙන අතර යම් පුද්ගලයෙක් හෝ ආයතනයක් තාර ලබාගැනීමේදි එම තත්ත්ව සහතිකය පිළිබඳ සැලකිල්ල යොමු කර තාර මිල දී ගන්නා ලෙසත් අමරසේකර මහතා ඉල්ලා තිබේ.