උසාවි නියෝග නොතකා දකුණේ ධීවරයෝ විරෝධයේ

ඉල්ලීම් කීපයක් මුල්කරගෙන සමස්ත ලංකා පොදුධීවර සම්මේලනය සංවිධානය කර තිබූ දැවැන්ත උද්ඝෝෂණයක් අද (28දා) මාතර නගර මධ්‍යයේදී පැවැත්විණි. එහිදී මාතර වෙරළ උද්‍යානය අසල විරෝධතාවේ නියැළෙමින් සිටියදී මාතර පොලීසිය අධිකරණ නියෝගයක් ලබාදෙමින් පවසා සිටියේ මාර්ගය අවහිර වනසේ හා පොදුදේපළවලට හානි නොවනසේ එම ස්ථානයේ පමණක් විරෝධතාවේ නිරත වන ලෙසයි.

එය ප්‍රකාශ කිරීමත් සමග 1500 පමණ ධීවර ජනතාව මොහොතකින් මාතර ප්‍රධාන මාර්ගයට අවතීර්ණවීම නිසා උණුසුම් තත්ත්වයක් ඇතිවිය.

පසුව විරෝධතාකරුවෝ මාතර ප්‍රධාන බස්නැවතුම්පොළ ඉදිරිපිටට පැමිණ මාර්ගය හරස් කරමින් විරෝධතාවේ නිරත වූහ. මේ නිසා මාතර ගාල්ල ප්‍රධාන මාර්ගයේ ගමනාගමනය පැයකට ආසන්න කාලයකට සම්පූර්ණ අඩාළ විය. පසුව ශබ්ද විකාශන යන්ත්‍රයක් යොදාගනිමින් උසාවි නියෝගය පොලීසිය විසින් කියවීමෙන් අනතුරුව විරෝධතාවේයෙදුණු පිරිස එය නතර කර දමන්නට තීරණය කළහ.

මාතර මහේෂ් මලවර ආරච්චි/ එච්.ඊ.ඒ. ප්‍රසාද්