ඇමති ඝාතනය කිරීමක් ගැන බුද්ධි අංශයට වාර්තා වී නෑ

යහපාලන ආණ්ඩුවේ පිරිසක් ඝාතනය කිරීමේ සූදානමක් තිබෙන බවට රජයේ සම කැබිනට් ප්‍රකාශක අමාත්‍ය රාජිත සේනාරත්න මහතා ඊයේ සඳහන් කළ කරුණ සම්බන්ධව මෙරට බුද්ධි අංශවලට මෙතෙක් තොරතුරු වාර්තා වී නැතැයි ආරක්ෂක රාජ්‍ය අමාත්‍ය රුවන් විජයවර්ධන මහතා පැවසීය.

රජයේ ප්‍රවෘත්ති දෙපාර්තමේන්තුවේ අද (12දා) පැවති ප්‍රවෘත්ති සාකච්ඡාවකදී ඒ මහතා වැඩිදුරටත් සඳහන් කළේ රාජිත සේනාරත්න මහතාට අමතර ආරක්ෂාවක් අවශ්‍ය බවට ආරක්ෂක අමාත්‍යාංශයෙන් ඉල්ලීමක් කළහොත් එම නිලධාරීන් ලබාදිය හැකි බවයි.

“රාජිත ඇමතිතුමාගේ එම ප්‍රකාශය මමත් දැක්කා. නමුත් අපිට කිසිම ආරංචියක් නැහැ. ආරක්ෂක අංශවලට එවැන්නක් කියලත් නැහැ. රාජිත සේනාරත්න අමාත්‍යවරයාට එවැනි ආරක්ෂාවක් අවශ්‍යයි නම් එය ලබාදිය හැකියි.

ඒ සම්බන්ධ මම අපේ බුද්ධි අංශ සමග සාකච්ඡා කළා. නමුත් මදුරාසියෙන් එවැනි පුද්ගලයන් පැමිණෙන බවට වාර්තා නොවන බවයි ඔවුන් සඳහන් කළේ. රටේ විවිධාකාර දේශපාලන මත දරන පුද්ගලයන් විවිධාකාරයට හිතනවා. ඒ නිසා යම් වැටහීමක් තිබෙනවා ඇති. නමුත් ආරක්ෂාව පිළිබඳව ප්‍රශ්නයක් නැහැ. ආරක්ෂක හමුදාව සහ නිලධාරීන් නිරන්තරයෙන් සෝදිසියෙන් සිටිනවා.

සියලු දෙනාට ලබාදී තිබෙන ආරක්ෂාව රාජිත අමාත්‍යවරයාටත් ලබාදී තිබෙනවා. එතුමාගේ ආරක්ෂාවට වැඩිදුර නිලධාරීන් අවශ්‍යයි නම් ඉල්ලීමක් කළොත් අපි ලබාදීමට සූදානම්. රාජිත ඇමතිතුමා ප්‍රකාශයක් කළාට ආරක්ෂක අමාත්‍යාංශයට තවම එම ප්‍රශ්නය යොමු කරලා නෑ. නීතිය හා සාමය පිළිබඳ ඇමති  සාගල රත්නායක සමග සාකච්ඡා කළාද කියන්න මම දන්නෑ"

ඡායාරූප- ඉසුරු පෙරේරා