අපේ පාර්ලිමේන්තුවේ තියෙන කෑම මොනවාද?

විදේශ රටවල පාර්ලිමේන්තුවල මන්ත්‍රීවරුන්ට දෙන ආහාර වේල් දිහා බැලූවිට ලංකාවේ පාර්ලිමේන්තුවේ ලබාදෙන්නේ මොනවාදැයි කියා සිතෙන බව කැබිනට් ප්‍රකාශක සෞඛ්‍ය හා දේශීය වෛද්‍ය අමාත්‍ය රාජිත සේනාරත්න මහතා පැවසීය.

කැබිනට් තීරණ දැනුම් දීම වෙනුවෙන් රජයේ ප්‍රවෘත්ති දෙපාර්තමේන්තුවේදී අද (22දා) පැවති ප්‍රවෘත්ති සාකච්ඡාවේදී වැඩිදුරටත් අදහස් දැක්වූ ඇමතිවරයා,

“මම ගිහින් තියෙනවා ලෝකේ සෑම පාර්ලිමේන්තුවකටම. විශාල වියදම් දරනවා. ඒ පාර්ලිමේන්තුවල කන්න දුන්නාම මට හිතෙනවා මෙහේ දෙන්නෙ මොනවද කියලා. ඒ තරම් ඉහළ කෑම වට්ටෝරු ඒ රටවල දෙනවා. ඒ මන්ත්‍රීවරු සුළු මුදලක් ඒකට ගෙවන්නේ. සමහර තැන්වල නිකන් දෙන්නේ. කිසිම මුදලක් අයකරන්නේ නැහැ.

අවුරුද්දෙන් අවුරුද්ද බඩු මිල වැඩි වෙනකොට පාර්ලිමේන්තුවේ ආහාර මිලත් වැඩි වෙනවා. අලුතෙන් වැඩිකරන්න දෙයක් නෑ.

අපි ආපු කාලේ තරම් දැන් කෑම වේල එච්චර හොඳ නෑ. ඒ දවස්වල උදේට බේකන්, සොසේජස්, ඌරු මස් තිබුණා. දැන් ඒවා ඔක්කෝම නෑනේ. සුද්දගේ කාලේ තිබුණු පරණ පාර්ලිමේන්තුවේ බොන්නත් තිබුණා. එතකොට ඇවිල්ලා දෙකක් ගහලා තමයි ඇතුළට එන්නේ" යනුවෙන් ප්‍රකාශ කළේය.