අනතුරකින් ජපුර සිසුන් 19ක් රෝහලේ

හෝමාගම,හයිලෙවල් මාර්ගයේ නාවින්න හන්දියේදී ඊයේ (2දා) රාත්‍රී 11 ට පමණ ශ්‍රී ජයවර්ධන පුර සරසවියේ සිසුන් ගමන් ගත් බස් රථයක් සහ මෝටර් රථයක්   මුහුණට මුහුණලා හැපීමෙන්  සිදුවූ අනතුරෙන් බස් රථයේ ගමන් ගත් සරසවි සිසුන් 19ක් තුවාල ලබා කළුබෝවිල රෝහලට ඇතුළත් කල බව පොලිසිය පවසයි.

රෝහල් ගත කළ සිසුන්ගෙන් බරපතල තත්ත්වයේ පසුවූ එක් සිසුවෙකු පසුව වැඩිදුර ප්‍රතිකාර සඳහා කොළඹ ජාතික රෝහලට  මාරු කර යවා ඇත.

තලංගම ප්‍රදේශයේ තිබු වැඩමුළුවකට සහභාගි වූ සිසුන් 65 දෙනෙකු ආපසු විශ්ව විද්‍යාලයට පැමිණෙමින් තිබූ විශ්ව විද්‍යාලයට අයත් බස් රථයක් මෙසේ අනතුරට පත්ව ඇත.

අනතුර සම්බන්ධයෙන් මෝටර් රථයේ රියදුරා අත්අඩංගුවට ගෙන වැඩිදුර පරීක්ෂණ පවත්වන බව හෝමාගම පොලීසිය පවසයි.

චතුරිකා  ජයරත්න