20 ට අගමැති පරමානු බෝම්බයක් හෙළුවා - කැෆේ

“20 වන ව්‍යවස්ථා සංශෝධනයට අගමැති රනිල් වික්‍රමසිංහ මහතා පරමානු බෝම්බයක් හෙළුවා.  ඒ තමයි හැමෝම එකග වුණ කේවල ආසන 160 හිතාගන්න වත් බැරි විදිහට 125 දක්වා අඩු කිරීමට යෝජනා කිරීම.  ඒ විතරක් නොවෙයි, මන්ත්‍රී සංඛ්‍යාව 255 සිට 225 දක්වා අඩු කලාම මේ ක්‍රමය ක්‍රියාත්මක නොවන තත්වයකට පත් වුණා.  සුලු පක්ෂ 20 ට විරෝධය පළ කළේ මේ බෝම්බයෙන් පස්සෙයි” යැයි කැෆේ සංවිධානයේ විධායක අධ්‍යක්ෂ කීර්ති තෙන්නකෝන් මහතා පැවසීය.

කොළඹ විශ්වවිද්‍යාලයේ ඉතිහාස සංගමය මගින් පැවැත්වූ ’20 වන සංශෝධනය යනු කුමක්ද?‘ සම්මන්ත්‍රණය අමතමින් තෙන්නකෝන් මහතා එසේ පැවසීය.

“දැන් කියනවා ‘ස්වාධීන මැතිවරණ කොමිසම පත් කරන්නේ මහ ඡන්දෙන් පස්සේලු.  ඡන්දේ තියන්නේ පොලිස්  කොමිසම යටතේ නොවෙයි ‘ජෝන් බාස්‘ ගේ පොලීසිය යටතේ ලු 20 වන සංශෝධනය ගැසට් කරන ගමන්ම කියනවා දැන් පාර්ලිමේන්තුව විසිරුවන්නලු.  මේක තමයි දේශපාලන අවස්ථාවාදය. යහපාලනය කරේ තියාගෙන ගිහින් රාජ්‍ය බලය ලබාගත් උදවියත් එකට උදව් කරපු උදවියත් අද ස්වාධීන මැතිවරණ කොමිසමට පත් කරන්නට පෙර මහා මැතිවරණයක් තියන්න කියනවා.  මහ ඡන්දෙට නැති ‘ස්වාධීන මැතිවරණ කොමිසම ‘ඡන්දෙන් පස්සේ කොස් කොටන්නද? ‘ කියලා ඔය මහා මැතිවරණ තදියමේ දගලන උදවිය කියන්නට ඕනි.

වසර විස්සක් මේ රටේ ජනතාව ස්වාධීන කොමිෂන් සභා ඉල්ලා සිටියා.  දැන් ඒ සදහා අවශ්‍ය ව්‍යවස්ථා සංශෝධනය සිදු වෙලා ඉවරයි.  නමුත් ඒවා ස්ථාපනය කරන්නට පෙර දැන් මහ ඡන්දයක් ඉල්ලවා.  මනාප ක්‍රමය අවසන් කරන්න, කොට්ඨාශ ක්‍රමයක් නැවත ගේන්න රටම ඉල්ලනවා.  දැන් ඒක කරන්නේ නැතිව පාර්ලිමේන්තුව විසිරුවන්නට කථා කරනවා.  මේක පිටුපස්සේ දේශපාලනඥයින්  විතරක් නොවෙයි අවස්ථාවාදීන් රැළක් ද ඉන්නවා.  19 ව්‍යවස්ථාවෙන් දිනාගත් ජයග්‍රහණ ආපසු හරවනකම් අපි බලාගෙන ඉන්නවාද?  නැතිනම් අද වගේම ‘පරීක්ෂා කොට අසමත්“ පාර්ලිමේන්තුවක් නැවත පත් කර ගන්නවාද කියා නැවත සිතා බලන්නට අවශ්‍ය” යැයි ද පැවසීය.