වර්ජනයෙන් මෝදිගේ රෝහල ඇතුළු රෝහල් කටයුතු අඩාලයි

දීපව්‍යාප්තව අද (22දා) ක්‍රියාත්මක වෛද්‍ය වර්ජනය හේතුවෙන් දික්ඔය මූලික රෝහලේ සායන කටයුතුද ඇණහිට තිබේ. මෙම රෝහල පසුගියදා ඉන්දීය අග්‍රාමාත්‍ය නරේන්ද්‍ර මෝදි මහතා විසින් විවෘත කරන ලදී.

රෝහලේ බාහිර රෝගී අංශයට පැමිණෙන රෝගීන් ආපසු හරවා යැවීමට රෝහල් සේවකයන් කටයුතු කරන අතර මේ හේතුවෙන් රෝගීහු විශාල පිරිසක් අසරණ තත්ත්වයට පත්ව සිටිති.

රෝහලේ හදිසි කටයුතු පමණක් අද (22දා) සිදුකරන බව එහි වෛද්‍යවරයෙක් පවසා සිටියේය.

විශ්වවිද්‍යාල සිසුන්ට එල්ලවූ ප්‍රහාරය, සයිටම් පෞද්ගලික වෛද්‍ය විද්‍යාලයට එරෙහිව හා තවත් ඉල්ලීම් කිහිපයක් මුල්කරගනිමින් ක්‍රියාත්මක මෙම වර්ජනය හෙට (23දා) උදෑසන  08.00 දක්වා ක්‍රියාත්මකවීමට නියමිතය.

ඒ අනුව එම කාලය තුළ දිවයිනේ අනෙකුත් සියලුම රෝහල්වලද හදිසි ප්‍රතිකාර ඒකක පමණක් ක්‍රියාත්මක වේ.

හැටන් රංජිත් රාජපක්ෂ/ අනුරාධපුර බී.ජී. චතුරංග