මියගොස් සිටි බව කී කාන්තාවකගේ දිවි බේරාගෙන

මාලඹේ  රත්නාරාම ප‍්‍රදේශයේ නිවෙක මිය ගොස් සිටි බවට සැක කළ කාන්තාවකගේ හුස්ම වැටීම හේතුවෙන් වහාම ඇය රෝහල් ගත කර ජීවිතය බේරා ගැනීමට අතුරුගිරිය පොලීසිය කටයුතු කර තිබේ.

නිවසක් තුළ පුද්ගලයෙන් දෙදෙනෙකු මිය ගොස් ඇති බවට ලැබුණු තොරතුරකට අනුව මරණ පරීක්ෂණය සඳහා හදිසි මරණ පරීක්ෂකවරිය සමග එහි ගොස් පරීක්ෂා කිරීමේදී මිය ගොස් ඇතැයි සැක සිතූ කාන්තාවකගේ හුස්ම වැටෙනු ඇය රෝහල් ගත කිරීමෙන් මෙසේ ජීවිතය බේරා ගෙන තිබේ.

හිටපු ජේෂ්ඨ පොලිස් අධිකාරීවරයෙකු සහ ඔහුගේ බිරිඳ නිවස තුළම මිය ගොස් ඇතැයි පොලිස් හදිසි ඇමතුම් අංකයට තොරතුරු ලැබී ඇත.

පසුව බොහෝ වේලාවක් ඔවුන්ට කතා කළද කිසිදු ප‍්‍රතිචාරයක් නොමැති බැවින්ද මෙම ගෙහිමියන් දින දෙකකින් පමණ නොදුටු බව අසල්වාසීන් පැවසූ නිසාවෙන් ද ඔවුන් දෙදෙනාම නිවස තුළ මිය ගොස් ඇතැයි සිතූ පොලිසිය තලංගම දකුණ හදිසි මරණ පරීක්ෂකවරිය වන පේ‍්‍රමලතා අබේවර්ධන මහත්මිය සහ නුගේගොඩ පොලිස් අපරාධ පරීක්ෂණ නිළධාරීන් කැඳවාගෙන මරණ පරීක්ෂක කටයුතු සදහා නිවසේ දොරගුලු කඩා ඇතුළු වී තිබේ.

කාන්තාවගේ හුස්ම වැටෙනු දැක වහාම සුව සැරිය ගිලන් රථයක ආධාරයෙන් රෝහල් ගත කිරීමට කටයුතු කිරීම නිසාවෙන් එම කාන්තාවගේ දිවි බේරා ගැනීමට හැකි වූ බවත් හිටපු ජේෂ්ඨ පොලිස් අධිකාරීවරයා මිය ගොස් සිටි බවත් පොලිසිය පවසයි.