තෙල් සංස්ථාව හා ලංවිම කිසිම අර්බුදයක් නෑ - රවී

ඛනිජ තෙල් සංස්ථාවත් සමඟ  ලංවිම කිසිම අර්බුදයක් නැති බව විදුලිබල,බලශක්ති සහ ව්‍යාපාර සංවර්ධන අමාත්‍ය රවී කරුණානායක මහතා පවසයි.

අමාත්‍යවරයා මෙම අදහස් පළකළේ, අද (02) පෙරවරුවේ කොළඹ පිහිටි එ.ජා.ප. කාර්යාලයේ පැවති අඩුආදායම්ලාභී පිරිස් වෙත පරිගණක ලබාදීමේ අවස්ථාවකට සහභාගී වෙමිනි.

එහිදි වැඩිදුරටත් අදහස් දැක්වු අමාත්‍යවරයා,

“ජනාධිපති ධූරයට ඉදිරිපත් වීමට අද නොයෙක් දෙනා අපේක්ෂා කරනවා. සමහරුන්ට එසේ අපේක්ෂා කිරීමට පවා කිසිදු සුදුසුකමක් නැහැ. මාධ්‍ය ඉදිරියට පැමිණ කතා කිරීම පමණක්ම ජනාධිපතිවරණයට සුදුසුකමක් වෙන්නේ නැහැ. එ.ජා.ප.ය කියන්නේ එක්කෙනෙක් දෙන්නෙක් ගොඩනැගුව පක්ෂයක් නෙමෙයි. බහුතරයකගේ කැපවීම මත ගොඩනැගුන පක්ෂයක්. මේ පක්ෂය තුළින් ජනාධිපතිවරණය වෙනුවෙන් ඉදිරිපත් කරන්නේ  වඩාත් පරිණතභාවයෙන් යුක්ත, මේ රට ජාත්‍යන්තරය කරා ගෙනයා හැකි, රටත් ජනතාවත් ගැන හිතන, ආදරයක් තියෙන, වැඩක් කළ හැකි  පුද්ගලයෙක්. මේ පුද්ගලයා අඩුම ගාණේ සාමාන්‍ය පෙළවත් සමත් පුද්ගලයෙක් විය යුතුයි. රෑ වැටුණ වලේ අපිට දවල් වැටෙන්නනම් බැහැ

ඛනිජ තෙල් සංස්ථාවත් සමග ලංවිම කිසිම අර්බුදයක් නැහැ. එකම දේ තමයි ඔවුන් අපි කියන දේ කරන්නේ නැති එක. මේ රටේ අහිංසක පුද්ගලයින්ට යම් පොරොන්දුවක් දුන්නානම්, අපි ඒ දේ මොන ආකාරයෙන් හෝ ඉෂ්ට කළ යුතුයි. ඒකට අපි බැදි සිටිනවා. මේ ගැටලුව සම්බන්ධයෙන් ජනතාවට ලිඛිතව පොරොන්දු වූ දෙයක් තිබෙනවා. අන්න ඒ දේ ඉටු කළ යුතුයි. අහිංසක ජනතාව පීඩාවට පත්කරන්න නම් මම ඉඩ තියන්නේ නැහැ. මේ පිරිස් සුඛෝපභෝගි මාලිගාවල ඉන්න පිරිසක් නොවෙයි. කුමාර වෙල්ගම ඇමතිතුමාටයි, අර්ජුන රණතුංග මැතිතුමාටයි මම ස්තුති කරනවා, මේ පිරිස කෙරෙහි මානුෂීය ආකාරයෙන් සිතලා, ඔවුන්ට ලිඛිතව පොරොන්දුවක් ලාබදීම පිළිබඳව.

මේ සිංහල බෞද්ධ රට බෞද්ධ රටක් නෙමෙයි කියන අබෞද්ධයෝ තවත් අබෞද්ධ වැඩ කරන පිරිස් ජනාධිපතිවරණයට නම් කරන්න හදනවානම්, එක්සත් ජාතික පක්ෂය ඒ වගේ දේවල් අනුමත කරන්නේ නැහැ. අපේ පක්ෂයේ විනයක් තිබෙනවා. නොයෙක් කල්ලි වලට අපේ පක්ෂයේ ඉඩක් නැහැ. පක්ෂයේ එකමුතුභාවය නැති කරන්න දෙන්නේ නැහැ. අද  යම් අය කශේරුවක් නැති තත්ත්වයට පත් වෙලා. මෙතෙක් කලක් රැකගෙන ආව එක්සත් ජාතික පක්ෂය , එක්කෙනෙක්ගේ  දෙන්නේක්ගේ  බූදලයක් බවට පත්කරන්න දෙන්නේ නැහැ” යනුවෙන් වැඩිදුරටත් පැවසීය.

කෂිනි හපුආරච්චි