කොරෝනා ආසාදිතයෙක් නිසා කරාපිටිය ස්නායු වාට්ටුවට ඇතුළුවීම හා පිටවීම තහනම්

කරාපිටිය ශික්ෂණ රෝහලේ ස්නායු රෝගින් සඳහා ප්‍රතිකාර කරනු ලබන 37 වාට්ටුවට කිසිවෙකුට ඇතුළු වීමට හෝ පිටවීමට තහනම් කරමින් තාවකාලිකව වසා දමා ඇතැයි රෝහල් ආරංචිමාර්ග සඳහන් කරයි.

ඒ අනුව එම වාට්ටුවේ රැඳී සිටින රෝගීන් වාට්ටුව තුළම රඳවාගෙන තිබෙයි. ඔවුන්ට වාට්ටුවෙන් පිටතට යෑමටත්, බාහිර පාර්ශ්වයකට වාට්ටුව තුළට යෑමටත් අවස්ථාව නොලැබේ.

කොරියාවේ සිට පැමිණ නිරෝධායනය වී අකුරැස්සේ නිවසකට ගොස් සිටිය දී කොවිඩ් - 19 අසාදිත බව තහවුරු කරගත් තරුණයා සිය පියා සමඟ මේ වාට්ටුවේ රැඳී සිටීම හේතුවෙන් මෙම තීරණය ගෙන ඇත.

ඔහුගේ පියා ස්නායු ආබාධිත තත්ත්වයක් හේතුවෙන් අකුරැස්ස රෝහලට ගෙන  ගොස් එතැනින් මාතර මහ රෝහලට මාරු කර යවා අනතුරුව කරාපිටිය ශික්ෂණ රෝහලට එවා ඇත. මෙම තරුණයා සිය පියාගේ උදව්වට වාට්ටුවේ රැඳී සිට තිබේ.

සිරංගිකා ලොකුකරවිට