අපිට දුන්නු වේදනාව තේරෙනවාද? ශිරාණිගේ පුතා නාමල්ගෙන් අසයි.

ඔබ සාධාරණය අනුකම්පාව අයදින්නට පෙර  නීතීඥයකු ලෙස ස්වභාවික යුක්තියේ මූලධර්මය ගැන බලන්න, යනුවෙන් හිටපු අගවිනිසුරු ආචාර්ය ශිරාණි බණ්ඩාරනායක මහත්මියගේ පුත් ශවීන් බණ්ඩාරනායක කාරියවසම් ඔහුගේ ෆේස්බුක් ගිණුමේ සටහන් කර ඇත.

තම මව වන හිටපු අගවිනිසුරු ආචාර්ය ශිරාණි බණ්ඩාරනායක, තම පියා, නැන්දා සහ මාමා මෙන්ම තමාද දේශපාලනඥයන් නොවන බවත්, එනමුත් ගිය රජය තම පවුල පීඩනයට පත් කළ බවත් එහි සදහන්ය.

හිටපු ජනපති ආර්යා ශිරන්ති රාජපක්ෂ මහත්මිය මූල්‍ය අපරාධ විමර්ශන කොට්ඨාසයට ගෙන්වීම මේ රජයෙන් කරන පලිගැනීමක් යැයි පාර්ලිමේන්තු මන්ත්‍රී නාමල් රාජපක්ෂ මහතා සටහන් කළ පණිවුඩයට ප්‍රතිචාර ලෙස ශවීන් එම පණිවුඩය සටහන් කර තිබේ.

‘මගේ මව, පියා, , නැන්දා, මාමා සහ මම ද දේශපාලනඥයන් නොවේ. පහුගිය අවුරුදු දෙක හමාරේ ඔබගේ ආණ්ඩුව මගේ දෙමාපියන්ට කළ පීඩා මට කොපමණ දැනුනාදැයි සිතන්න. මගේ දෙමව්පියන් අල්ලස් කොමිසමට ගෙන ගිය අවස්ථාවේ මට මොනවද දැනුනේ? හරකුන් දක්කාගෙන යනවා වගේ මගේ දෙමාපියන් අධිකරණයට ගෙනයද්දී මට මොනවද දැනුණේ? හේතුවක් නැතිව රජයේ මාධ්‍ය මගේ දෙමාපියන්ට නිග්‍රහ කරද්දී මට කොහොම දැනෙන්නට ඇත්ද?ඔබ සාධාරණය අනුකම්පාව අයදින්නට පෙර  නීතීඥයකු ලෙස ස්වභාවික යුක්තියේ මූලධර්මය ගැන බලන්න.‘