කිම් කාඩේෂියන් ගැන තොරතුරු පිරික්සීම අනතුරුදායක වෙලාලු

ජනප්‍රිය රියැලිටි තරුවක් වන කිම් කාඩේෂියන් ගැන නිරන්තරයෙන් තොරතුරු සොයන්නෙකු නම් ඉදිරියේදී පරිස්සමින් කටයුතු කරන ලෙසට අනතුරු ඇඟවීමක් සිදුකර තිබේ.

මීට හේතු වශයෙන් බ්‍රිතාන්‍යයේ සයිබර් ආරක්ෂණ සමාගමක් වන මැකෆී (McAfee) ආයතනය පෙන්වා දෙන්නේ 2018 වසරේ එක්සත් රාජධානිය තුළ කරනලද ඉන්ටර්නෙට් සෙවුම් අතරින් වැඩිම භයානක නම කිම් කාඩේෂියන් බව මේ වනවිට තහවුරු වී ඇති බවයි.

විශේෂයෙන්ම, ප්‍රසිද්ධ චරිතවල නම් අඩංගු ඉන්ටර්නෙට් සෙවුම් ප්‍රතිඵල, වෛරස් අන්තර්ගත වූ හානිකර විය හැකි වෙබ් අඩවි සමග ඈඳී තිබේද යන්න මැකෆී ආයතනය විසින් මැන බලනු ලැබේ.

පසුගිය වසරේ එවැනි සෙවුම්වල ඉහළින්ම දැක්වුණු නම වූයේ ක්‍රෙග් ඩේවිඩ් වන අතර, මෙවර එම සෙවුම් ලැයිස්තුවේ දෙවැනි ස්ථානයේ ප්‍රකට නිරූපණ ශිල්පිනී නයෝමි කැම්බල් සිටියි. තෙවැනි ස්ථානයේ පසුවන්නේ කිම් කාඩේෂියන්ගේ සොහොයුරිය වන කර්ට්නි කාඩේෂියන්ය.

ඔවුන් පෙන්වාදෙන පරිදි, සයිබර් අපරාධකරුවන් විසින් ප්‍රසිද්ධ පුද්ගලයන්ගේ නම් සඳහන් ලින්ක්ස් භාවිත කර, ඉන්ටර්නෙට් පරිශීලකයින් රවටමින් වෛරස අඩංගුවිය හැකි හානිකර වෙබ් අඩවි වෙත යොමු කරනු ලබන බවය. පරිගණක වෛරස් ස්ථාපනය කිරීමට මෙන්ම රහස් පද සහ පෞද්ගලික තොරතුරු ලබාගැනීමට එවැනි වෙබ් අඩවි භාවිත කෙරෙන බවද මැකෆී ආයතනය වැඩිදුරටත් පෙන්වා දෙයි.