මාතෘ හා ළමා මරණ අවම කිරීම කාලීන අවශ්‍යතාවක් බව සුව ඇමති පවසයි

කලාපය තුළ මාතෘ හා ළදරු මරණ අනුපාතය පහළ මට්ටමක පවත්වා ගනිමින් විශිෂ්ට ප්‍රගතියක් ලබාගැනීමට ශ්‍රී ලංකාව සමත්ව ඇතැයි සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න මහතා පවසයි.

ශ්‍රී ලංකාවේ සජීවී දරු උපත් 1000කට වාර්තා වන මාතෘ මරණ සංඛ්‍යාව 30ක් වන අතර, ළදරු මරණද සජීවී දරු උපත් 1000කට 08ක් වැනි ඉතා අඩු අගයක පවත්වා ගැනීමට හැකිව ඇති බවත්, සංවර්ධනය වෙමින් පවතින රටවල් සමග සැලකූ විට එය ඉතා ප්‍රශස්ත තත්ත්වයක් බවත් ඒ මහතා පැවසීය. 

තවදුරටත් මරණ සංඛ්‍යාව පහත දැමීමේ අභියෝගය පවතින අතර, එය ඉතා දුෂ්කර ඉලක්කයක් බවත්, එහිදී අදාළ කරුණ කේන්ද්‍රර කරගත් වැඩපිළිවෙළක් අවශ්‍ය බවත් හෙතෙම පැවසීය.

විශේෂයෙන් එහිදී ගර්භිණී, නූපන් සහ අලුත උපන් දරුවන් කෙරෙහි වැඩි අවධානය යොමු කළ යුතු බව සෞඛ්‍ය අමාත්‍යවරයා ප්‍ර‘කාශ කළේය.
හෙතෙම මෙම අදහස් පළ කළේ 'පරාජන්ම සංගමයේ' වාර්ෂික සැසිවාරය අමතමිනි. 

වසර 16කට පෙර ස්ථාපනය කළ මෙම සංගමය ගර්භිණී, නූපන් සහ අලුත උපන් දරුවන්ගේ සෞඛ්‍ය තත්ත්වය යහපත් මට්ටමක පවත්වා ගැනීමට සුවිශේෂී ක්‍රියාමාර්ග ගෙන ඇති අතර, මේ වනවිට ප්‍රවේණි විද්‍යාව, රෝග විනිශ්චය, සෞඛ්‍ය පරිපාලනය සහ තොරතුරු ආදිය කෙරෙහි දක්වා ඔවුන්ගේ සේවාව ව්‍යාප්ත කර ඇති බවත්, සංගමය ගෙනයන වැඩපිළිවෙළට සෞඛ්‍ය අමාත්‍යාංශයේ පූර්ණ සහයෝගය ලබාදෙන බවත් ඒ මහතා පැවසීය. 

වෛද්‍ය කපිල ජයරත්න මහතාගේ සහභාගීත්වයෙන් සංගමය මේ වනවිට පුළුල් වැඩපිළිවෙළවල් රැසක් ක්‍රියාවට නංවා ඇති අතර, දැනුවත් කිරීමේ වැඩසටහන්, පුහුණු වැඩසටහන්, සෞඛ්‍ය සේවකයන් වෙනුවෙන් මාර්ගෝපදේශන සැපයීම මෙන්ම විශේෂයෙන් මහජනතාව දැනුවත් කිරීම උදෙසා ගෙන යන ප්‍රචාරණ වැඩසටහන් අගය කළ යුතු බව සෞඛ්‍ය අමාත්‍යවරයාගේ අදහසයි.

මෙහිදී සෞඛ්‍ය අමාත්‍යවරයා විසින් ශ්‍රී ලංකා පරාජන්ම සංගමයේ නව වෙබ් අඩවිය විවෘත කළ අතර, එහි ලාංඡනයද එළිදක්වන ලදී.

මෙම අවස්ථාව සඳහා අමාත්‍ය සරත් අමුණුගම මහතා ඇතුළු පිරිසක් එක්ව සිටියහ.