කාන්තා හිමිකම් තහවුරු කිරීම එකම අරමුණ කරගත් 2018 අැමෙරිකානු රූ රැජින

මේ දිනවල ඇමෙරිකාවට බලපා ඇති අයහපත් කාලගුණික තත්ත්වය මැද වුවද පැවැත්වූ 97 වැනි ඇමෙරිකානු රූ රැජින තරගාවලියේ ජය සනිටුහන් කිරීමට විසිතුන් හැවිරිදි කාරා මුන්ඩ් සමත්වූවාය. උතුරු ඩකෝටා ප්‍රාන්තය නියෝජනය කරමින් තරග වැදි ඇය ඇමෙරිකානු රූපරාජිනී ඉතිහාසයේ පළමුවරට එම කිරුළ උතුරු ඩකෝටා ප්‍රාන්තය වෙත දිනා දීමද විශේෂත්වයකි. 2017 ඇමෙරිකානු රූ රැජිනිය වූ සර්වි ශීල්ඩ් විසින් 2018 නව රූ රැජින අභිසෙස් ගැන්වීම සිදුවූයේ නිව් ජර්සි නුවරදී 10 වැනිදා රාත්‍රියේ පැවැත්වූ උත්කර්ෂවත් රාත්‍රියේදීය.
කාරා ඇමෙරිකාවේ බ්‍රවුන්ස් සරසවියේ උපාධිධාරිනියක වන අතර, ඇය මේ වනවිට %නෝත් ඩෑම්^ සරසවියේ නීති විද්‍යාලයට තේරී පත්ව සිටින්නීය.

කුඩා වියේ සිටම විවිධ රූපරාජිනී තරගාවලි සඳහා ඉදිරිපත්ව ජය ගෙන ඇති ඇය ඇමෙරිකානු රූ රැජින ලෙස කිරුළු දැරීමත් සමග ඇමෙරිකානු ඩොලර් පනස් දහසක ශිෂ්‍යත්වයක් සඳහාද ඇමෙරිකානු ඩොලර් ලක්ෂයක් ඉක්මවූ මාසික වේතනයකටද හිමිකම් කියන්නීය.
මේ දක්වා තමන් සිදුකළ වෛද්‍ය පරීක්ෂණ හමුවේ තෙවරක්ම පිළිකා රෝගයේ ලක්ෂණ පෙන්නුම් කරන බවට තහවුරු වූ බවද ඇය මෙම තරගාවලියට ඉදිරිපත් වෙද්දී හෙළිකර තිබුණි.

ඉදිරියේදී කාන්තා හිමිකම් තහවුරු කිරීම වෙනුවෙන් ක්‍රියාකාරීව පෙනී සිටීම තම එකම අරමුණ බවද ඇය සඳහන් කර තිබිණ.