මොළයට ව්‍යායාම ලබාදෙන සුදොකු

ඇන්ඩ්‍රොයිඩ් සමගින්: Sudoku Free

දිනෙන් දින තාක්ෂණය දියුණු වන ලෝකයේ ජීවත් වන ඔබට මුහුණපාන්නට සිදුවන එක් ගැටළුවක් වන්නේ, ඔබගේ එදිනෙදා ක්‍රියාකාරකම්, කාර්යාලයීය කටයුතු සහ පුද්ගලික කටයුතු පවා අතිශයින් පහසු කරවීමට තාක්ෂණය මගින් ඉඩ හසර ලබාදීමයි. දැන් ඔබට පැන නඟින ගැටළුව වන්නේ එය ගැටළුවක් වන්නේ කෙසේද යන්නයි. සැබවින්ම මිනිසාගේ එදිනෙදා ක්‍රියාකාරකම් පහසු වනවාත් සමගින්ම, මිනිසාව වඩාත් කම්මැලි සත්වයෙක් කිරීමටද මෙම විවිධාකාර තාක්ෂණික සහකරුවන් සමත්ව සිටිනා බව ඔබට මඟ හැර යා නොහැකි සත්‍යයයි. විශේෂයෙන්ම ශරීරය වෙහෙසවීමේ අවශ්‍යතාවයන් අවම වී ඇතිවාක් මෙන්ම, ඔබගේ තාක්ෂණික සහකරුවන් සමගින් ඔබට මොළය වෙහෙසවීමේ අවශ්‍යතාවයද අවම වී තිබේ. මේ නිසා ඔබේ මොළයට තාක්ෂණය තුළින්ම ව්‍යායාම ලබාගැනීම අනිවාර්ය කරුණකි.

සඳහන් කළ  යුතු අනෙක් කාරණාව වන්නේ, මොළය නිරන්තරයෙන් වෙහෙස කරවන අයෙකු වූවත් සිය මොළයේ හැකියාවන්ගෙන් ප්‍රයෝජනයට ගන්නේ ඉතාමත්ම සුළු ප්‍රතිශතයක් බවයි. මේ නිසා මොළයට නිවැරදි ව්‍යායාම ලබාදීම තුළින් ඔබේ මානසික සහ බුද්ධිමය හැකියාවන් තවත් ඉහළ තලයකට ගෙන ඒමට හැකියාව තිබේ.

මේ හඳුන්වා දෙන්නට යන්නේ ඒ සඳහා උපකාරී වනු ඇති ඇන්ඩ්‍රොයිඩ් යෙදුමකි.

සුදොකු ලෙසින් හැඳින්වෙන්නේ තර්කය මත පදනම් වූ සාම්ප්‍රදායික අංක සමායෝජන ක්‍රීඩාවකි. මේ වනවිට මෙය ලොව පුරා චෙස් ක්‍රීඩාව මෙන්ම අතිශය ජනප්‍රියත්වයක් ලඟා කරගෙන ඇති ක්‍රීඩාවක් ලෙසින් හැඳින්විය හැකිවේ. එසේම මෙහි ඇති මොළයට ව්‍යායාමයක්, අභියෝගයක් වීමේ හැකියාවද සුළුප‍ටු නොවේ.

සුදොකු ක්‍රීඩාවේ නීති රීති බැලූ බැල්මට සංකීර්ණ බවක් පෙනී ගියද, වරක් දෙවරක් ක්‍රීඩා කිරීමෙන් පසුව ඔබට එහි නීති රීති මනාව වැටහී යනු ඇත. ඉන් පසුව නිරන්තරයෙන් සුදොකු ක්‍රීඩාවේ නියැළීමත් සමග ඔබට ගණිත සමායෝජනයන් පහසු වන්නා සේම ඔබේ බුද්ධිමය හැකියාවන්ද තියුණු වනු ඇත.

මෙම Sudoku Free ඇන්ඩ්‍රොයිඩ් යෙදුම මගින් ඔබට ස්මාට්ෆෝනය ඔස්සේ සුදොකු ක්‍රීඩා කිරීමට ඉඩ ප්‍රස්ථාව ලැබෙනු ඇත. මෙහි අසීරුතා සැකසුම් හතරක් තිබෙනා අතර, ඔබට අවශ්‍ය නම් අසීරු අවස්ථාවන්හිදී ඉඟි ලබාගැනීමටද හැකියාව තිබේ.

එසේම සාම්ප්‍රදායිකව සුදොකු ක්‍රීඩා කිරීමට වඩා මෙහි ඔබේ ක්‍රියාවන් අවලංගු කිරීමට ඇති පහසුකම, නැතිනම් ඔබේ වැරදි පෙන්වාදීමේ හැකියාව නිසා ඔබගේ වැරදි නිවැරදි කර ගැනීමට වඩාත් හොඳ අවස්ථාවක් තිබේ.

goo.gl/hapP52