ඉතිහාසයේ පළමු වතාවට ජීවිතාරක්ෂක ක්‍රීඩකයින්ට පොදු රාජ්‍ය මණ්ඩලීය රන් පදක්කමක්

එංගලන්තයේ පැවති 2025 පොදු රාජ්‍ය මණ්ඩලීය ජීවිතාරක්ෂක ශූරතා තරගාවලියේ දී ශ්‍රී ලංකාවට ජීවිතාරක්ෂක ඉසවකින් රන් පදක්කමක් හිමි කර ගැනීමට හැකි වී ඇති අතර එම රන් පදක්කම හිමි කර ගත් හිරුණ ද සිල්වා සහ මීදුම් මෙන්ඩිස් ක්‍රීඩකයින් දෙදෙනා 07/16 දින රාත්‍රී කටුනායක ගුවන් තොටුපොළ  වෙත පැමිණියහ.

මෙම තරගාවලිය පොදු රාජ්‍ය මණ්ඩලීය රටවල් 32 ක ක්‍රීඩක ක්‍රීඩිකාවන් 75 දෙනෙකුගේ සහභාගීත්වයෙන් ඉකුත් 07/10 දින සිට 07/13 දින දක්වා එංගලන්තයේ වේල්ස් නුවර පවත්වා තිබුණි.

ලෝකයේ වේගවත්ම ක්‍රීඩා ඉසව්වක් වන තත්පර 10 ක් ඇතුළත මීටර් 12.50 ක දියඹෙහි සිටින පුද්ගලයෙකු ගොඩට ඇද ගැනීමේ  " ලණුවක් මගින් ගලවා ගැනීම " ( Line Throw ) ඉසව්වට සහභාගී වූ හිරුණ ද සිල්වා සහ මීදුම් මෙන්ඩිස් මෙම ඉසව්ව තත්පර 09.98 ක කාළයකින් නිම කර මෙම රන් පදක්කම දිනා ගෙන තිබුණි.

එසේම මෙම තරගාවලියේ දී හිරුණ ද සිල්වා " නැගී එන දක්ෂතම ක්‍රීඩකයාට '' හිමි සම්මානය ද හිමි කර ගැනීමට සමත් වී තිබුණි.

මෙම ක්‍රීඩකයින් දෙදෙනා කොළඹ ආනන්ද විද්‍යාලයේ උසස් පෙළ විෂයයන් හදාරන සිසුන් වීම විශේෂත්වයකි.

මොවුන් දෙදෙනා 07/16 දින සවස 05.45 ට දෝහා සිට කටාර් ගුවන් සේවයේ කිව්.ආර්.- 654 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබූ අතර ඔවුන් පිළිගැනීම සදහා ශ්‍රී ලංකා ජීවිතාරක්ෂක සංගමයේ නිලධාරීන් මෙන්ම කොළඹ ආනන්ද විද්‍යාලයේ විදුහල්පතිතුමා ඇතුළු ආචාර්ය මණ්ඩලයේ පිරිසක් ද ගුවන් තොටුපොළ වෙත පැමිණ සිටියහ.