ශ්‍රී ලංකා 'ඒ' කණ්ඩායමට කඩුලු 08ක පරාජයක්

ශ්‍රී ලංකා 'ඒ' කණ්ඩායමේ නවසීලන්ත සංචාරය ආරම්භ කරමින් ක්‍රයිස්චර්ච්හි අද (05දා) පැවැති පළමු නිල නොවන එක්දින තරගයෙන් සත්කාරක නවසීලන්ත 'ඒ කණ්ඩායම හමුවේ කඩුලු 08ක පරාජයක් අත්විඳීමට ශ්‍රී ලංකාවට සිදුවිය.

නවසීලන්ත 'ඒ කණ්ඩායමේ ඇරයුමෙන් පළමුව පන්දුවට පහරදුන් ශ්‍රී ලංකා 'ඒ කණ්ඩායමට පන්දුවාර 45.3 ක් අවසානයේදී සියල්ලන් දැවී රැස්කිරීමට හැකිවූයේ ලකුණු 214 ක් පමණි. කිතුරුවන් විතානගේ (58) හා ආරම්භක පිතිකරු ධනුෂ්ක ගුණතිලක (57) අර්ධ ශතක රැස්කරමින් දක්‍ෂතා දැක්වුවද, සෙසු පිතිකරුවන් වගකීම් පැහැර හැරිය හෙයින් තරගයක් ලබාදිය හැකි ලකුණු සංඛ්‍යාවක් කරා ශ්‍රී ලංකා 'ඒ ඉනිම රැගෙන යාමට නොහැකි විය. ප්‍රතිවාදී පන්දු යවන්නන් අතරින් ශ්‍රී ලංකා පිතිකරුවන්ට දැඩි පීඩනයක් එල්ල කළ මයිකල් සැන්ටර් 4/38 ක් ලෙස කඩුලු දවාලමින් දස්කම් දැක්වීය. ඔහුට අමතරව ඉෂ් සෝධි 3/28 ක් ලෙස කඩුලු දවාලීය.

ලකුණු 215ක පහසු ඉලක්කයක් හඹාගිය නවසීලන්ත 'ඒ පිතිකරුවෝ ජයග්‍රාහී ඉලක්කය තරගයේ 39.3 වැනි පන්දුවාරයේදී පසුකර යාමට සමත් වූහ. ශ්‍රී ලංකා 'ඒ පන්දු යවන්නන් ඉදිරියේ පාලනය නොවූ ඉනිමක් ක්‍රීඩාකළ ජෝර්ජ් වෝකර් නොදැවී ලකුණු 83 ක් රැස්කරමින් ජයග්‍රාහී කඩඉම කරා ඉනිම රැගෙන ගියේය. ඔහුට අමතරව මයිකල් පොලාඩ් අර්ධ ශතකයකින් (59) දායක විය. නවසීලන්ත 'ඒ ඉනිමේ බිඳවැටුණු කඩුලු ද්විත්යේම හිමිකරුවා වූයේ ශෙහාන් ජයසූරියයි (2/36).

නවසීලන්ත 'ඒ කණ්ඩායම ලැබූ මෙම ජයග්‍රහණයත් සමග තරග හතරකින් සමන්විත තරගාවලියේ තරග 1 – 0 ක් ලෙස ඔවුන් පෙරමුණේ පසුවන අතර, මෙම තරගාවලියේ දෙවැනි තරගය අනිද්දා (07දා) මෙම ක්‍රීඩාංගණයේදීම පැවැත්වීමට නියමිතව ඇත.

ක්‍රික්ඉන්ෆෝ ලකුණු පුවරුව