පොලීසිය හා සිසුන් සාමකාමීයි

අන්තර් විශ්වවිද්‍යාල ශිෂ්‍ය බලමණ්ඩලය සංවිධානය කළ විරෝධතාව සඳහා රාජකාරියේ යොදවා තිබූ කිසිදු පොලිස් නිලධාරියෙකුට බැටන් හෝ වෙනත් අවියක් නිකුත් නොකළ බව පොලිස් මාධ්‍ය ප්‍රකාශක කාර්යාලය පවසයි.

වැඩබලන පොලිස්පති පූජිත ජයසුන්දර මහතාගේ අධීක්ෂණය යටතේ මෙම රාජකාරී කළ බවත් කඳුළු වායු, ජල ප්‍රහාරක ටැංකි හා කැරලි මර්දන කණ්ඩායම්ද විරෝධතාවට නොකැඳවූ බවත් පොලීසිය කියයි.  අද (03දා) පැවැති මෙම විරෝධතාව සඳහා පොලිස් නිලධාරීන් 2000ක් පමණ රාජකාරියේ යෙදවූ බවද පොලීසිය නිකුත් කළ නිවේදනයේ දැක්වෙයි.

විරෝධතා පාගමන සඳහා සිසුන් 5000කට අධික පිරිසක් එක්ව සිටි අතර, ඔවුහු ශ්‍රී ජයවර්ධනපුර විශ්වවිද්‍යාලයේ සිට වෝඩ් පෙදෙසේ පිහිටි විශ්වවිද්‍යාල ප්‍රතිපාදන කොමිෂන් සභාව දක්වා සාමකාමීව පාගමනින් පැමිණ ඒ ඉදිරිපිට සත්‍යග්‍රයක නිරත වූහ.