උඩරට දුම්රිය මාර්ගයේ දුම්රිය ධාවනයට බාධා

කොළඹ කොටුවේ සිට බදුල්ල දක්වා ධාවනය වූ රාත්‍රී තැපැල් දුම්රිය හැටන් සහ කොටගල දුම්රිය ස්ථාන දෙක අතර කොටගල අඩි හැටේ පාලම අසලදී පීලි පැනීමකට ලක්ව තිබේ.

පීලි පැනීමෙන් දුම්රිය මැදිරි හතරකට දැඩි අලාභ හානි සිදුව ඇති අතර, දුම්රිය පාලමද කැඩීගොස් තිබේ. අද (13දා) අලුයම 2.00 ට පමණ මෙම පීලි පැනීම සිදුව තිබේ.

දුම්රියේ සෙසු මැදිරි ගලවා මගීන්ව බදුල්ල දක්වා එම දුම්රියෙන්ම රැගෙන යෑමට දුම්රිය පාලක මැදිරිය කටයුතු කර තිබේ. දුම්රිය මාර්ගය යථාතත්ත්වයට පත්කරන තෙක් එම මාර්ගයේ ධාවන කටයුතු හැටන් සහ කොටගල දුම්රිය ස්ථාන දෙක අතර පමණක් ධාවනය කිරීමට දුම්රිය පාලක මැදිරිය කටයුතු කර ඇත.

දුම්රිය මැදිරිවල රෝද ගැලවී පාලමෙන් පහළට වැටී ඇති බවද දුම්රිය පාලක මැදිරිය සඳහන් කරයි.