පසුගිය දින කිහිපය තුළ බ්‍රැන්ඩික්ස් (Brandix) සමග යම් සම්බන්ධ වූ අයෙක් සිටී නම් ඔවුන් නිවාස තුළම රැඳී සිටින ලෙසත් යම් ස්වසන අපහසුතාවක් හෝ පූර්ණ රෝග ලක්ෂණයක් පවතී නම් ඔවුන් තම ප්‍රදේශයේ සෞඛ්‍ය වෛද්‍ය නිලධාරී දැනුවත් කර වහාම රෝහල්ගත වීම සිදු කරන ලෙස වසංගත රෝග විද්‍යා අංශයේ අධ්‍යක්ෂ විශේෂඥ වෛද්‍ය සුදත් සමරවීර මහතා පැවසීය.

කොවිඩ් 19 වෛරසය ආසාදිත බව තහවුරු වූ මිනුවන්ගොඩ ප්‍රදේශයේ කාන්තාව සේවය කළඇඟලුම් කම්හලේසේවය කළ මධ්‍යම පළාතේ පිරිසක් හඳුනාගැනීමෙන් පසු මේ වන විට මහනුවර මාතලේ හා නුවරඑළිය දිස්ත්‍රික්කවල පුද්ගලයන් දාහත් දෙනෙකු ස්වයං නිරෝධායනයට යොමුකර තිබෙන බව මධ්‍යම පළාත් සෞඛ්‍ය සේවා අධ්‍යක්ෂ වෛද්‍ය වීරසූරිය මහතා පවසයි.

කොරෝනා රෝගය ආසාදිත වූ දිවුලපිටිය කාන්තාව සේවය කළ මිනුවන්ගොඩ ඇගළුම් කම්හලෙහි සේවය කළ මහර සෞඛ්‍ය වෛද්‍ය නිලධාරී බල ප්‍රදේශයට අයත් පිළිකුත්තුව ප්‍රදේශයේ පදිංචි 29 හැවිරිදි පුද්ගලයෙකුටද වෛරසය ආසාදනය වී ඇති බව සෞඛ්‍ය අංශ සඳහන් කරයි.

හඳුනාගත් කොවිඩ් අසාදිතයන්ගේ සමීපතමයන් හඳුනාගෙන රෝගය පැතිරයාම වැළැක්වීමටත් රෝගීන් හඳුනා ගැනීමේ PCR පරීක්ෂණ සංඛ්‍යාව වැඩිකිරීමටත් කඩිනම් පියවර ගන්නැයි ජනාධිපති ගෝඨාභය රාජපක්ෂ මහතා අදාළ පාර්ශ්වයන්ට උපදෙස් දෙයි.

හෙට (06) රට පුරා ඇඳිරි නීතිය පනවා ඇති බවට සමාජ මාධ්‍ය ඔස්සේ හුවමාරුවෙමින් පවතින සාවද්‍ය ප්‍රචාරයන්ට නොරැවටෙන්නැයි රජය ජනතාවගෙන් ඉල්ලා සිටී.

මිනුවන්ගොඩ ඇඟලුම් කම්හලේ සේවය කර යාපනයට පැමිණි සේවිකාවකට ද කොරෝනා ආසාදනය වී ඇති බව වාර්තා වේ.‍

දින කිහිපයක් පුරා ධනාත්මක වර්ධනයක් පෙන්වූ කොළඹ කොටස් වෙළඳපොළ අද දිනයේදී කඩා වැටීමකට ලක්විය. ඒ අනුව සමස්ත කොටස් මිල දර්ශකය ඒකක 462.99ක් ලෙස සියයට 7.65කින් පහළ ගියේය.

කොරෝනා වෛරසය සම්බන්ධයෙන් පැන නගින ගැටලු විසදා ගැනිමට මහජනතාව වෙනුවෙන් පැය 24ම ක්‍රියාත්මක දුරකථන අංකයක් හදුන්වා දිමට සෞඛ්‍ය ප්‍රවර්ධන කාර්යාංශය පියවර ගෙන තිබේ.

මුස්ලිම් අන්ත්වාදීය මැඩපැවැත්වීමේ පියවරක් ලෙස මුස්ලිම් කාන්තාවන් මුහුණ ආවරණය කරමින් පළදින නිඛාබය තහනම් කිරිමට ආරක්ෂක මණ්ඩලය තුළ සකාච්චා කළ බවත් එසේ වුවද හිටපු අගමැති රනිල් වික්‍රමසිංහ මහතා එයට විරුද්ධ වීම හේතුවෙන් එය ක්‍රියාත්මක කිරීමට නොහැකි වූ බවද සිරිසේන මහතා කීවේය.

දිවුලපිටිය කොවිඩි 19 රෝගියාගේ ආශ්‍රිතයෙකු ලෙස මොණරාගලදි හඳුනාගත් කාන්තාවටද කොවිඩි 19 වැලදි අතැයි ඒ සමිබන්ධයෙන් සිදුකළ පි.සි.ආර් පරික්ෂණයේදි තහවුරු වු බව මොණරාගල ප්‍රාදේශිය සෞඛ්‍ය සේවා අධ්‍යක්ෂක වි.එන්.සි දසනායක මහතා පවසයි

දිවුලපිටියේ ඇඟලුම් ආයතනයේ සේවය කල තවත් පිරිසකට කොරෝනා වයිරසය ආසාදනය වීම හේතුවෙන් එම ආයතනයේ සේවය කල යාපනයේ කාන්තාවන් දෙදෙනෙකු හා ඔවුන්ගේ පවුල්වල පිරිස් පී.සී.ආර්. පරික්ෂණයට යොමු කල බවට යාපනය ශික්ෂණ රෝහලේ වෛද්‍ය ටී.සත්‍යමූර්ති මහතා පවසා සිටියේය.

ගම්පහ දිස්ත්‍රික්කයේ දිවුලපිටිය ඇඟළුම් කම්හලේ සේවක සේවිකාවන් හා ඔවුන් ළඟින් ඇසුරු කළ ආශ්‍රීතයින් මෙන්ම පාසල් දරුවන්ද ඇතුළුව 2000කට ආසන්න පිරිසකගේ PCR පරික්ෂන කටයුතු අද දින සිදු කළ බව සෞඛ්‍ය අමාත්‍යාංශය සඳහන් කරයි.

ගම්පහ දිස්ත්‍රික්කයේ දිවුලපිටිය ප්‍රදේශයෙන් කෝවිඩ් ආසාදිතයෙකු වාර්තා විමත් සමඟ ගම්පහ ප්‍රදේශයේ පිහිටි සියලු කර්මාන්ත ශාලාවල කාර්ය මණ්ඩලය PCR පරික්ෂණයට ලක් කිරිමට ක්‍රියා කරන බව සෞඛ්‍ය අමාත්‍යාංශය සඳහන් කරයි.

කුරුණෑගල ශික්ෂණ රෝහලට ප්‍රතිකාර සඳහා ඇතුළත් කර සිටි මිනුවන්ගොඩ ඇඟළුම් කම්හලේ සේවිකාවන් දෙදෙනෙකුටද කොරෝනා වෛරසය ආසාදනය වී ඇති බව අද (5දා) තහවුරු වූ බව කුරුණෑගල ශික්ෂණ රෝහලේ නියෝජ්‍ය අධ්‍යක්ෂ වෛද්‍ය චන්දන කැඳන්ගමුව මහතා ප්‍රකාශ කළේය.

දිවුලපිටිය කොවිඩ් ආසාදිත කාන්තාවගේ ආශ්‍රිතයෙක් නෙළුම්දෙණිය බටපොතැල්ල ප්‍ර දේශයෙන් හඳුනාගැනීමත් සමග ඔහුගේ පවුලේ උදවිය නිවාස නිරෝධානයට ලක්කර තිබේ.

මුඛ ආවරණ නොමැතිව පැමිණෙන මගීන් බස් රථවලට නොගන්නා බව පෞද්ගලික බස් හිමියන්ගේ සංගමය සඳහන් කර සිටියි.

දිවුලපිටිය පාසලේ සිසුන් 1400කට ආසන්න පිරිසක් ස්වයං නිරෝධානයට ලක්කර තිබේ.

විභාග සහතික පත්‍ර නිකුත් කිරීම ඔන්ලයින් (Online) ක්‍රමය ඔස්සේ පමණක් සිදු කරන බව ශ්‍රී ලංකා විභාග දෙපාර්තමේන්තුව පවසයි.

මිනුවන්ගොඩ රෝහල කොවිඩ් ආසාදිතයන් වෙනුවෙන් ප්‍රතිකාර කරන රෝහලක් වශයෙන් වෙන්කර තිබේ.

මිනුවන්ගොඩ ප්‍රදේශයෙන් වාර්තා වූ කොරෝනා රෝගීන් කිහිප දෙනා නිසා එය හදිසි තත්ත්වයක් ලෙස දැනුම් දෙන අතර,එය සමාජය තුළ තවදුරටත් සම්ප්‍රේෂණය පාලනය කළ යුතු බව සෞඛ්‍ය අමාත්‍යාංශය නිවේදනය කරයි.

කොවිඩ් 19 වසංගතය නත්ත්වය හමුවේ සියලු පාසල්වල දෙවැනි වාර නිවාඩුව කලින් ආරම්භ කිරීමත් සමග සියලුම බෞද්ධ දහම් පාසල්ද නිවාඩු ලබාදීමට තීරණය කර ඇති බව බෞද්ධ කටයුතු කොමසාරිස් සුනන්ද කාරියප්පෙරුම මහතා පවසයි.

දිවයිනේ ඇති සියලූම බන්ධනාගාර වෙත අමුත්තන් පැමිණීම අත්හිටුවීමට තීරණය කර ඇතැයි බන්ධනාගාර කොමසාරිස් ජනරාල් තුෂාර උපුල්දෙණිය මහතා පවසයි.

තවත් කෝවිඩ් ආසාදිතයෙකු පූර්ණ සුවය ලබා පිටව යෑමත් සමග පූර්ණ සුවය ලැබූ කෝවිඩ් ආසාදිතයින් ගණන 3259 දක්වා ඉහල ගොස් ඇත.

රාජ්‍ය භාෂා දෙපාර්තමේන්තුව විසින් හෙට (6) සිට ආරම්භ කිරිමට සැලසුම් කර තිබු රාජ්‍ය භාෂා ප්‍රවිණතා වාචික පරික්ෂණය පවතින තත්ත්වය මත දින නියමයක් නොමැතිව කල් දමන බව රාජ්‍ය භාෂා කොමසාරිස් ජනරාල් ප්‍රින්ස් සේනාධිර මහතා පවසයි.

බස්නාහිර පළාත තුළ සිදුකළ විශේෂ වැටලිමකදි මුදල් වංචාවලට සම්බන්ධ 37 දෙනෙකු අත්අඩංගුවට ගෙන තිබේ.

මෙවර පැවැත්විමට නියමිත උසස් පෙළ විභාගය හා ශිෂ්‍යත්ව විභාගය සම්බන්ධ අවසන් තිරණය අද හෝ හෙට ගන්නා බව අධ්‍යාපන අමාත්‍ය මහාචාර්ය ජි.එල් පිරිස් අද කොළඹ පැවති මාධ්‍ය හමුවකට එක්වෙමින් සඳහන් කළේය.

ආණ්ඩුක්‍රම ව්‍යවස්ථාවේ 20 වන සංශෝධන පනත් කෙටුම්පත අභියෝගයට ලක්කරමින් ගොනුකර තිබෙන පෙත්සම් සලකා බැලීම ශ්‍රේෂ්ඨාධිකරණය විසින් අවසන් කර ඇත.

දේශීය හඳුන්කූරු නිෂ්පාදකයින් මුහුණපා ඇති ගැටලුවලට විසදුම් ලබාදීමේ අරමුණෙන් ලංකා කාර්මික සංවර්ධන මණ්ඩලය විසින් හඳුන්කුරු නිෂ්පාදකයින්ගේ පාර්ශ්වය සහ අදාළ ක්ෂේත්‍රයට සම්බන්ධ රජයේ ආයතනයන්හි ප්‍රධානීන් එක් කරගනිමින් විශේෂ සාකච්ජාවක් කර්මාන්ත අමාත්‍ය විමල් වීරවංශ මහතාගේ ප්‍රධානත්වයෙන් කර්මාන්ත අමාත්‍යංශයේ දී පැවැත්වීය.

මිනුවන්ගොඩ බ්‍රැන්ඩික්ස් ආයතනයේ කාර්ය මණ්ඩල සාමාජිකයන්ට කරනු ලැබූ පී.සී.ආර්. පරීක්ෂණවලදී එහි සාමාජිකයන් 69කට කොවිඩ් ආසාදනය වී ඇති බවට මේ වන විට තහවුරු වී තිබේ.